पान ६ मुंबई
------------
आंबा उत्पादकांना ‘दरा’साठी हवा आधार

चंद्रकांत मोकल : कृषी, मूल्यसाखळी परिषदेत केली मागणी

मुंबई : जगातील युद्धजन्य परिस्थिती, हवामान बदल, मार्केटिंग आणि निर्यातीमधील चढ-उतारामुळे आंबा उत्पादक अडचणीत आला आहे. आंबा उत्पादक शेतकऱ्यांना बाजारभावातील घसरणीमुळे होणारे नुकसान टाळण्यासाठी राज्य सरकारने आधार द्यावा अशी मागणी महाराष्ट्र राज्य आंबा उत्पादक संघाचे अध्यक्ष चंद्रकांत मोकल यांनी केली.

महाराष्ट्र राज्य आंबा उत्पादक संघाच्या वतीने पुण्यश्लोक अहिल्यादेवी होळकर यांच्या स्मृती दिनानिमित्त व आंतरराष्ट्रीय महिला शेतकरी वर्षानिमित्त नुकतीच राष्ट्रीय शेअर बाजार (एनएसई) येथे नुकतीच कृषी, फलोत्पादन, सिंचन, प्रक्रिया मार्केटिंग, कोल्डचेन व वेअर हाउसिंग परिषद झाली. या वेळी ते बोलत होते.

या वेळी ते म्हणाले, ‘‘शेतकरी हवामान बदलाला सामोरे जाऊन प्रचंड कष्ट घेऊन मोठ्या प्रमाणात खर्च करून उत्पादन घेतो. मात्र सक्षम मार्केटिंग व्यवस्था नसल्यामुळे तो निष्प्रभ होतो. ही परिस्थिती बदलावी यासाठी सक्षम मार्केटिंग मिळणे आवश्‍यक आहे.’’

राष्ट्रीय शेअर बाजारचे (एनएसई) मुख्य अर्थतज्ज्ञ तीर्थकार पटनाईक यांनी फलोत्पादनातील शेतकऱ्यांना मार्केट संधी उपलब्ध करून देण्यासाठी प्रयत्न करण्यात येतील, असे आश्‍वासन दिले. रिलायन्स इंडस्ट्रीजचे खरेदी व प्रकल्प विभागाचे अध्यक्ष बी. नारायण यांनी रिलायन्स इंडस्ट्रीज कृषी फलोत्पादन रिटेल क्षेत्रात करीत असलेल्या कार्याची माहिती दिली.

पीडीलाइट इंडस्ट्रीज लि.चे अध्यक्ष डॉ. पी. के. शुक्ला यांनी आपल्या मनोगतात, ‘आपल्या देशाला असलेला मोठा समुद्र किनारा पाहता समुद्र शेवाळच्या माध्यामाने प्रक्रिया उद्योगाला मोठा वाव आहे. यासाठी स्थानिकांनी पुढे येण्याची गरज आहे,’ असे आवाहन केले.

या वेळी कृषी फलोत्पादन, सिंचन, मार्केटिंग प्रक्रिया आदी क्षेत्रात उल्लेखनीय कार्य केलेल्या शेतकरी, शेतकरी गट, शेतकरी उत्पादक कंपन्यांना सन्मानित करण्यात आले.