Latest Marathi Crime Update: नाट्यनिर्मात्याची फसवणूक केल्याचा आरोप असल्याप्रकरणी दाखल असलेल्या गुन्ह्याच्या मागील सुनावणीला हजर न राहिलेले मराठा आरक्षण आंदोलनाचे नेते मनोज जरांगे-पाटील दोन ऑगस्टला असलेल्या पुढील तारखेला न्यायालयात हजर राहतील, अशी माहिती त्यांच्या वकिलांनी बुधवारी (ता. २४) न्यायालयास दिली.

सुनावणीला हजर न राहिल्याने जरांगे यांच्याविरोधात प्रथमवर्ग न्यायदंडाधिकारी ए. सी. बिराजदार यांनी मंगळवारी (ता. २३) अटक वॉरंट काढले आहे. हे वॉरंट रद्द करण्याची विनंती त्यांचे वकील संतोष खामकर यांनी न्यायालयास केली.

तबीयत बरी नसल्याने ते सुनावणीला हजर राहू शकले नाहीत. मात्र पुढील सुनावणीला ते हजर राहतील, असा युक्तिवाद ॲड. खामकर यांनी केली. मात्र सुनावणीसाठी आरोपींचे हजर राहणे गरजेचे असल्याचे न्यायालयाने नमूद केले.

नाटकांचे प्रयोग आयोजित करून त्याचे पैसे न दिल्याप्रकरणी जरांगे यांच्यासह अर्जुन प्रसाद जाधव आणि दत्ता बहीर (सर्व रा. अंबड, जालना) यांच्याविरोधात फसवणूक व अपहार केल्याप्रकरणी कोथरूड पोलिस ठाण्यात गुन्हा दाखल आहे. याबाबत धनंजय घोरपडे (रा. वारजे) यांनी फिर्याद दिली होती.

त्यानंतर न्यायालयाच्या निर्देशानुसार हा गुन्हा दाखल करण्यात आला. या प्रकरणात न्यायालयाने जरांगे पाटील यांना दोनदा समन्स बजावले होते. मात्र, आंदोलनामुळे ते न्यायालयात हजर झाले नव्हते. त्यामुळे न्यायालयाने जरांगे पाटील यांच्यासह अन्य दोन आरोपींविरोधात अजामीनपात्र वॉरंट बजावले होते. यापूर्वीही जरांगे यांच्याविरोधात न्यायालयात गैरहजर राहिल्याने अजामीनपात्र वॉरंट बजावण्यात आले होते.

त्यानंतर जरांगे मे अखेरीस न्यायालयात हजर झाले होते. न्यायालयाने जरांगे यांना ५०० रुपयांचा दंड ठोठावून पुढील सुनावणीला नियमितपणे हजर राहण्याच्या अटींवर वॉरंट रद्द केले होते. परंतु, त्यानंतरही जरांगे सुनावणीला गैरहजर राहिल्याने अखेर न्यायालयाने त्यांच्याविरोधात अटकेचे वॉरंट काढले आहे.