पुणे - पिंपळाच्या पानाच्या आकारात साकारलेले, एक मीटर उंचीचे आणि सर्वांत जुने दीडशे वर्षांचे उंबर, तीन इंच उंचीचे सर्वांत लहान बोन्साय अशा असंख्य प्रजातींचे बोन्साय वृक्ष; यांसह इटली, जपान, इंग्लंड, ऑस्ट्रेलिया, अमेरिका अशा जवळपास १६ देशांमधील बोन्साय कलाकारांचा सहभाग असणारे अनोखे प्रदर्शन आणि त्यानिमित्त आयोजित जागतिक बोन्साय परिषद येत्या गुरुवारपासून (ता. २२) सुरू होत आहे. बोन्साय कलाकार प्राजक्ता काळे यांनी तयार केलेले तब्बल एक हजार बोन्साय वृक्ष प्रदर्शनात मांडण्यात येणार असून प्रदर्शनाची तयारी आता अंतिम टप्प्यात आली आहे.

या प्रदर्शनात दहा विभागांमध्ये ‘मामे’, ‘शोहीन’, ‘स्मॉल बोन्साय’, ‘मीडियम बोन्साय’, ‘लार्ज’ आणि ‘एक्‍स्ट्रॉ लार्ज बोन्साय’ अशा अनेक प्रकारच्या बोन्सायचा समावेश असणार आहे. प्रदर्शनाच्या उद्‌घाटनानिमित्त दुर्गा जसराज यांची निर्मिती असलेला ‘पंचतत्त्व’ हा विशेष कार्यक्रम नागरिकांना पाहता येईल. कार्यक्रमात पृथ्वी, जल, वायू, अग्नी आणि आकाश या पाच तत्त्वांची वैशिष्ट्ये कलाविष्कारातून उलगडणार आहेत. उस्ताद रशीद खाँ (गायन), पं. विश्‍वमोहन भट (मोहनवीणा), प्रवीण गोडखिंडी, पं. शशांक सुब्रह्मण्यम, सेल्वा गणेश, तौफिक कुरेशी, पं. श्रीधर पार्थसारथी, पं. रतन मोहन शर्मा, अंकिता जोशी, पं. विजय घाटे, मुकुंद पेटकर हे नामवंत कलाकार सादरीकरण करणार  आहेत.

शरद पवार यांच्या हस्ते उद्‌घाटन 
‘बोन्साय नमस्ते’ या पहिल्या जागतिक बोन्साय परिषदेचे उद्‌घाटन माजी केंद्रीय कृषिमंत्री शरद पवार यांच्या हस्ते गुरुवारी (ता. २२) होणार आहे. सिंचननगर येथील कृषी महाविद्यालयाच्या मैदानावर दुपारी साडेचार वाजता हा कार्यक्रम होणार आहे. या परिषदेच्या उद्‌घाटनप्रसंगी ज्येष्ठ शास्त्रज्ञ डॉ. रघुनाथ माशेलकर, ‘इंडियन बॅंक’चे व्यवस्थापकीय संचालक आणि प्रमुख कार्यकारी अधिकारी किशोर खरात, ‘बॅंक ऑफ महाराष्ट्र’चे व्यवस्थापकीय संचालक आणि प्रमुख कार्यकारी अधिकारी रवींद्र मराठे, ‘टाटा कॅपिटल’चे व्यवस्थापकीय संचालक आणि प्रमुख कार्यकारी अधिकारी प्रवीण कडले, ‘महिंद्रा अँड महिंद्रा फायनान्शिअल सर्व्हिसेस’चे व्यवस्थापकीय संचालक रमेश अय्यर उपस्थित राहणार आहेत.