पिंपरी (पुणे) : अॅक्‍सिस बँकेची 76 लाख 50 हजार रुपये असलेली कॅशव्हॅन चालकाने लुटून बुधवारी (ता. 31) नेली. या प्रकरणी एकाला वाकड पोलिसांनी ताब्यात घेतले आहे. कॅशव्हॅन लुटीमध्ये तीन ते चार आरोपी असून ही नियोजनबद्ध लूट असल्याचे तपासात निष्पन्न झाले आहे. रणजित धर्मराज कोरेकर (रा. माऊलीनगर, दिघी) या कॅशव्हॅन चालकाच्या विरोधात गुन्हा दाखल केला आहे. 

चोरून नेलेली कॅशव्हॅन बुधवारीच भोसरी येथे मिळून आली. मात्र त्यातील पैसे असलेली पेटी मिळून आली नव्हती. गुरुवारी शिक्रापूरजवळ फक्‍त रिकामी पेटी आढळून मात्र त्यातील पैसे मिळून आले नाहीत. दरम्यान वाकड पोलिसांनी कॅशव्हॅन लूट प्रकरणी एका संशयितास ताब्यात घेतले आहे. हा गुन्हा एकट्या कॅशव्हॅन चालकाने केला नसून त्यामध्ये तीन ते चार जण असून नियोजनबद्ध कट असल्याचे समोर आले आहे. उर्वरित आरोपींच्या मागावर पोलिस गेले आहेत.