पिंपरी - सावित्रीबाई फुले पुणे विद्यापीठाने बीएस्सीच्या (तृतीय वर्ष) भौतिकशास्त्र विषयासाठी मार्च २०१८चीच प्रश्‍नपत्रिका ऑक्‍टोबर २०१८ मध्ये दिली. दोन्ही प्रश्‍नपत्रिकेतील सर्व प्रश्‍न एकच आहेत. 

पुणे विद्यापीठातील प्रत्येक सेमिस्टरसाठी (मार्च आणि ऑक्‍टोबर) स्वतंत्र प्रश्‍नपत्रिका काढण्यात येते. भौतिकशास्त्र विभागाच्या मॅथॅमॅटिकल मेथड इन फिजिक्‍स (पॅटर्न २०१३) या विषयाची मार्चमध्ये काढलेली प्रश्‍नपत्रिकाच गेल्या शनिवारी (ता. २०) पुन्हा विद्यार्थ्यांना  देण्यात आल्याने एकच खळबळ उडाली. ही प्रश्‍नपत्रिका ४० गुणांची आहे. 

प्रश्‍नपत्रिका हातात पडल्यावर काही प्राध्यापकांना शंका आली. त्यांनी खात्री केली. त्यावर ऑक्‍टोबरची तारीख पाहून, त्यांनी परीक्षार्थींना प्रश्‍नपत्रिका वाटली. अनेक विद्यार्थ्यांनी परीक्षेच्या तयारीसाठी जुन्या प्रश्‍नपत्रिका सोडविलेल्या असतात. त्यांना ही जुनीच प्रश्‍नपत्रिका असल्याचे लक्षात आले. त्यांनी ती बाब प्राध्यापकांच्या लक्षात आणून दिली. 

यासंदर्भात नाव न छापण्याच्या अटीवर संबंधित प्राध्यापकांनी सांगितले, की दोन्ही सेमिस्टरसाठी एकच प्रश्‍नपत्रिका देण्यात आली. त्यामध्ये प्रश्‍न व उदाहरणांचाही फरक नाही. 

मार्च व ऑक्‍टोबरमध्ये झालेल्या परीक्षांची प्रश्‍नपत्रिका एकच असल्याची कोणतीही तक्रार विद्यापीठाकडे आलेली नाही. त्याबाबत आम्ही आता कोणतेही भाष्य करू शकत नाही.
 -डॉ. अशोक चव्हाण, परीक्षा विभाग प्रमुख,  सावित्रीबाई फुले पुणे विद्यापीठ