लोणी काळभोर, ता. २५ : नवीन फ्लॅट खरेदीसाठी माहेरून १० लाख रुपये आणण्याचा तगादा लावून विवाहितेचा शारीरिक व मानसिक छळ केल्याप्रकरणी लोणी काळभोर पोलिसांनी पतीसह सासरच्या चौघांविरुद्ध गुन्हा दाखल केला आहे.
याप्रकरणी पती संदेश नवनाथ वारे, सासू निर्मला नवनाथ वारे, सासरे नवनाथ वारे आणि दीर संकेत नवनाथ वारे यांच्यावर गुन्हा नोंदवण्यात आला आहे. पीडित महिलेचा विवाह मे २०२४ मध्ये झाला होता. लग्नानंतर काही महिने संसार सुरळीत चालल्यानंतर, सासरच्यांनी किरकोळ कारणावरून छळ सुरू केला.
तक्रारीनुसार, महिला गर्भवती असतानाही तिला जड कामे करण्यास भाग पाडले गेले, ज्यामुळे तिला शारीरिक त्रास झाला. त्यानंतर पतीने व सासूने फ्लॅटसाठी १० लाख रुपयांची मागणी लावून धरली. पैसे देण्यास असमर्थता दर्शवल्याने तिला मारहाण करण्यात आली. २२ जुलै २०२६ रोजी आरोपींनी पीडितेच्या नातेवाइकांना बोलावून अपमानित केले आणि ‘पैसे देणार नसाल तर मुलीला घेऊन जा’ असे धमकावून तिला घराबाहेर काढले, तसेच तिचे दागिने व साहित्य स्वतःकडे ठेवून घेतले, असे फिर्यादीत नमूद केले आहे. याप्रकरणी लोणी काळभोर पोलिस अधिक तपास करत आहेत.