नसरापूर - दापोडे (ता. वेल्हे) येथील राजगड ज्ञानपीठाच्या तानाजी मालुसरे माध्यमिक व उच्च माध्यमिक विद्यालयाचे माजी विद्यार्थी बाळासाहेब मारुती शेंडकर यांनी विवाह समारंभातील अनावश्‍यक खर्च टाळून शाळेस १ लाख ११ हजार १११ देणगी दिली. 

बाळासाहेब शेंडकर यांचे शालेय शिक्षण तानाजी मालुसरे विद्यालयात झाले असून, ते नामांकित कंपनीत नोकरीस आहेत. शाळेला पुस्तके, क्रीडा व विज्ञान साहित्यासाठी त्यांनी गतवर्षी २० हजार रुपयांची देणगी दिली होती. आदर्श विद्यार्थी पुरस्काराची रक्कमही तेच देतात. २४ एप्रिल रोजी त्यांनी स्वतःच्या विवाह प्रसंगी अनावश्‍यक खर्चाला फाटा देत शाळेला १ लाख ११ हजार १११ रुपयांची देणगी दिली. देणगीचा धनादेश पत्नी शीतल यांच्या उपस्थितीत मुख्याध्यापक बी. एस. पवार यांच्याकडे सुपूर्त केला.

या प्रसंगी आमदार संग्राम थोपटे, जिल्हा परिषद सदस्य दिनकर धरपाळे, माजी उपसभापती चंद्रकांत शेंडकर उपस्थित होते.  आमदार थोपटे यांनी या उपक्रमाची प्रशंसा केली.