पुणे - राज्य सरकारकडून खरेदी केल्या जाणाऱ्या गोळ्या-औषधांची खरेदी मागील वर्षभरापासून करण्यात आली नाही. यामुळे पुरवठा न झाल्याने जिल्ह्यातील प्राथमिक आरोग्य केंद्रांमध्ये गोळ्या-औषधांचा तुटवडा निर्माण झाला आहे. जिल्हा परिषदेने या संदर्भात पर्यायी व्यवस्था निर्माण करावी, अशी मागणी सर्वपक्षीय जिल्हा परिषद सदस्यांनी केली आहे. 

ताज्या बातम्यांसाठी डाऊनलोड करा ई-सकाळचे ऍप

जिल्ह्यातील सरकारी दवाखान्यांत गोळ्या-औषधांचा तुटवडा निर्माण झाल्याने रुग्णांना फक्त तपासणीवर समाधान मानावे लागत आहे. थंडी वाढल्याने सध्या सर्दी, खोकला, हिवताप यांसारख्या साथीच्या आजारांचे रुग्ण वाढले आहे. तसेच डेंगी, टॉयफाईड, मलेरिया आदी आजारांचाही धोका वाढला आहे. तांत्रिक अडचणीमुळे सरकारने वर्षभरापासून औषधांची खरेदी केली नाही. यामुळे औषधांचा तुटवडा निर्माण झाल्याचे जिल्हा परिषदेच्या आरोग्य विभागातील अधिकाऱ्यांनी सांगितले. जिल्ह्यात 96 प्राथमिक आरोग्य केंद्र आणि 539 उपकेंद्र कार्यरत आहेत. रुग्ण कल्याण निधीतून गोळ्या-औषधांची खरेदी करण्याची मागणी भाजप गटनेते शरद बुट्टे-पाटील यांनी केली आहे. जिल्हा परिषदेने पर्यायी व्यवस्था करून रुग्णांची गैरसोय दूर करण्याची मागणी जिल्हा परिषद सदस्यांनी मुख्य कार्यकारी अधिकारी उदय जाधव यांच्याकडे केली आहे. 

तात्पुरती व्यवस्था करणार : माने 
राज्य सरकारने वर्षभरापासून जिल्ह्यातील प्राथमिक आरोग्य केंद्रांसाठी औषधे खरेदी केलेली नाहीत, त्यामुळे पुरवठा होऊ शकला नाही. मात्र, यावर आता जिल्हा परिषदेने तात्पुरती उपाययोजना केली आहे. यासाठी प्रत्येक आरोग्य केंद्राला रुग्ण कल्याण निधीतून पैसे उपलब्ध करून दिले जाणार असल्याचे आरोग्य सभापती प्रवीण माने यांनी सांगितले.