वाघोली (पुणे) :  पुणे महापालिकेत पूर्वी समावेश केलेल्या 11 गावात कोणताही विकास झालेला नाही. तीच परिस्थिती वाघोलीचा महापालिकेत समावेश केल्यावर होईल. त्यामुळे 'आमचा गाव आमची ग्रामपंचायत बरी' असा सूर शनिवारी झालेल्या बैठकीत निघाला. 

वाघोलीचा महापालिकेत समाविष्ट करावा की नाही, याबाबत ग्रामपंचायत सभागृहात शनिवारी बैठक बोलविली होती. या बैठकीसाठी आजी माजी सरपंच, उपसरपंच, सदस्य व ग्रामस्थ उपस्थित होते. पूर्वी घेतलेल्या 11 गावांची दुरावस्था झाली आहे. त्यात अजून 23 गावांची भर पडेल. वाघोलीचा कर व गायरान जागा यामध्येच सध्या महापालिकेला रस असेल. समाविष्ट गावात कसा विकास करणार. त्याचा आराखडा केला का ? किती निधी राखीव ठेवणार ? हे राज्य शासनाने स्पष्ट करायला हवे. 

हे ही  वाचा : Sakal Impact : सांडपाणी वाहिनीची गळती थांबली

ही गावे घेतल्यानंतर पुणे महापालिकेचे क्षेत्रफळ मुंबई पेक्षा मोठे होईल. महापालिकेला एवढ्या क्षेत्रफळाचा विकास करणे शक्य होईल का ? स्वतंत्र महापालिका स्थापन करूनच गावांचा समावेश करणे योग्य होईल. अन्यथा खूप वाईट अवस्था वाघोलीची होईल. सध्या ग्रामपंचायत योग्य विकास करीत आहेत. नागरिकांच्या समस्या जाणून घेण्यासाठी सध्या 17 सदस्य आहेत. महापालिकेत गेल्यास एक किंवा दोन नगरसेवक असतील. त्यामुळे नागरिकांच्या समस्या जाणून घेण्यासाठीही कोणी नसेल. यामुळे आमचा गाव आणि आमची ग्रामपंचयातच बरी. असे मत उपस्थितांनी व्यक्त केले. 

ताज्या बातम्यांसाठी डाऊनलोड करा ई- सकाळचे ऍप 

महापालिकेत घेतल्यानंतर त्वरित विकासाची खात्री कोणी देणार का ? ग्रामपंचायत पदाधिकारी, लोकप्रतिनिधी यांना विश्वासात का घेतले जात नाही.
- राजेंद्र सातव, माजी उपसरपंच

महापालिकेत घेतल्यानंतर विकास झाला नाही तर त्याची जबाबदारी कोण घेणार आहे. सध्या ग्रामपंचायत माध्यमातून चांगला विकास सुरू आहे. 
- संजय सातव, माजी उपसरपंच

मुख्यतः पाणी व अन्य सुविधा त्वरित मिळणे गरजेचे आहे. त्याची शाश्वती कोण देणार आहे. 
- रामदास दाभाडे, माजी जिल्हा परिषद सदस्य.

केवळ ग्रामपंचायत कर व गायरान जागा यामध्येच महापालिकेला रस असेल. त्वरित विकासाचे लेखी आश्वासन कोणी देईल का ? 
- सर्जेराव वाघमारे, पंचायत समिती सदस्य.