पुणे  वनाज- रामवाडी मार्गावरील मेट्रोच्या तीन स्थानकांचे रखडलेले काम मार्गी लागण्याची शक्‍यता निर्माण झाली आहे. सर्व्हिस लाइन स्थलांतरित करण्यासाठी खर्च उचलण्याची तयारी महामेट्रोने बुधवारी दर्शविली. त्यासाठीचा प्रस्ताव महापालिकेला सादर केला आहे. 

वनाज-रामवाडी मेट्रो मार्गावर वनाज, आयडियल कॉलनी आणि आनंदनगरमध्ये मेट्रोच्या स्थानकांचे काम तीन महिन्यांपूर्वी सुरू झाले. एका स्थानकाला चार प्रवेशद्वारे असतील. त्यासाठी ४० खांब उभारणार आहेत. त्यामुळे तीन स्थानकांसाठी १२० खांब उभारण्यात येणार आहे. परंतु तीन महिन्यांत फक्त सहा खांब उभारले आहेत. वनाज येथील नियोजित स्थानकासाठी वनाज कंपनीकडून १५० चौरस मीटर जागा महामेट्रोला उपलब्ध झाली नाही. 

वनाज, आयडियल कॉलनी आणि आनंदनगरमध्ये स्थानकांसाठी खांब उभारण्याचे काम सुरू असताना पाण्याच्या, पावसाळी पाण्याच्या आणि सांडपाणी वाहिन्यांच्या जलवाहिन्या असल्याचे दिसून आले. ज्या ठिकाणी शक्‍य आहे तेथे महामेट्रोने खांबांची अलाइनमेंट बदलली. या वाहिन्या स्थलांतरित करण्यासाठी त्यांनी महापालिकेला विनंती केली. परंतु त्याबाबत पाहणी करून काम सुरू करू, अशी भूमिका महापालिकेने घेतली. त्यामुळे या स्थानकांचे काम रखडले आहे. या पार्श्‍वभूमीवर आता या वाहिन्या स्थलांतरित करण्यासाठी महामेट्रो खर्च करेल, असा प्रस्ताव पालिकेला सादर केला आहे. त्याला महापालिकेने होकार दर्शविला आहे. प्रशासकीय औपचारिकता पार पडल्यावर त्याबाबतचे काम मार्गी लागेल.

महापालिकेच्या सर्व प्रकारच्या  वाहिन्या स्थलांतरित करण्याचा खर्च उचलण्याची तयारी असल्याचे महापालिकेला कळविले आहे. त्यांनी परवानगी दिल्यावर याबाबतचे काम सुरू होईल. तसेच टेलिफोन, केबल आणि गॅस कंपन्यांशीही चर्चा  सुरू असून, लवकरच काम सुरू होईल. - अतुल गाडगीळ, प्रकल्प व्यवस्थापक, महामेट्रो

केबल, गॅस कंपन्यांना साकडे
टेलिफोन कंपन्यांच्या केबल्स तसेच एमएनजीएलच्या गॅस वाहिन्या स्थलांतरित करण्यासाठी संबंधित कंपन्यांना साकडे घातले आहे. त्यांच्याकडे याबाबत चर्चा सुरू असून, त्यांनीही सकारात्मक प्रतिसाद दर्शविला आहे. लवकरच स्थानकांसाठी खांब उभारण्याचे काम सुरू होईल, असे महामेट्रोकडून सांगण्यात आले.