पुणे - पुणे गृहनिर्माण व क्षेत्रविकास मंडळ (म्हाडा) अंतर्गत येणाऱ्या चार हजार 756 सदनिकांसाठी शुक्रवारी (ता. 7) सकाळी दहा वाजता अल्पबचत भवन येथे ऑनलाइन सोडत काढण्यात येणार आहे. या सदनिकांसाठी एकूण 41 हजार 501 जणांचे ऑनलाइन अर्ज प्राप्त झाल्याची माहिती म्हाडाचे मुख्याधिकारी अशोक पाटील यांनी दिली. 

आर्थिक दुर्बल घटक, अल्प, मध्यम आणि उच्च उत्पन्न गटातील गरजूंना परवडणारी घरे मिळावीत, यासाठी म्हाडाच्या पुणे मंडळांतर्गत प्रयत्न सुरू आहेत. मंडळाच्या पुणे, सातारा, सांगली, कोल्हापूर आणि सोलापूर या पाचही जिल्ह्यांत मिळून आजअखेर 40 हजार 702 सदनिका आणि भूखंड बांधून वितरित करण्यात आले आहेत. या ऑनलाइन सोडतीमध्ये यशस्वी अर्जदारांना एसएमएसद्वारे कळविण्यात येईल. सोडतीची संपूर्ण प्रक्रिया आणि निकाल वेबकास्टवर उपलब्ध करून देण्यात येणार आहे. त्यामुळे अर्जदारांना सोडतीचे संपूर्ण प्रक्षेपण वेब कास्टिंगद्वारे www.bit.ly/punemhada_live2019 या यू-ट्यूब लिंकवर ऑनलाइनही पाहता येईल. या सोडतीमध्ये यशस्वी झालेल्या अर्जदारांनी पात्रतेबाबतची कागदपत्रे कॅनरा बॅंकेच्या एकूण 139 शाखांपैकी कोणत्याही एका शाखेत सहा जुलैपर्यंत प्रत्यक्ष जाऊन अपलोड करावयाची आहेत. या शाखांची यादी म्हाडाच्या संकेतस्थळावर उपलब्ध आहे. 

म्हाडाची पुढील सोडत ऑगस्टअखेर 
""म्हाडाच्या पुणे मंडळांतर्गत सदनिकांसाठी पुढील जाहिरात ऑगस्टअखेरीस निघणार आहे. त्यात म्हाडाच्या तीन हजार 351 सदनिका आणि 20 टक्के सर्वसमावेशक योजनेतील पुणे आणि पिंपरी-चिंचवड महापालिका हद्दीतील एकूण एक हजार 393 सदनिका अशा एकूण मिळून चार हजार 744 सदनिकांचा समावेश असेल,'' अशी माहिती म्हाडाच्या वतीने देण्यात आली. 

म्हाडाची घरे उत्तम दर्जाची असून, ऑनलाइन सोडतीला नागरिकांचा चांगला प्रतिसाद मिळत आहे. नागरिकांची घरांची गरज पाहता म्हाडाच्या वतीने या पुढेही उच्च प्रतीच्या दर्जाची घरे उपलब्ध करून देण्याचा प्रयत्न असेल. ऑनलाइन प्रक्रियेमुळे संपूर्ण कामकाज पारदर्शी राहणार आहे. 
- अशोक पाटील, मुख्याधिकारी, म्हाडा, पुणे मंडळ.