पारगाव, ता. ९ : आंबेगाव तालुक्याच्या पूर्वभागातील पारगाव कारखाना पोलिस ठाण्याच्या हद्दीतील एका गावातील दोन अल्पवयीन मावस बहिणींवर चार जणांनी मिळून सामूहिक बलात्कार केला. तसेच, या आरोपींनी मुलींवर अत्याचार केल्याचा व्हिडिओ काढून तो दुसऱ्याला दिला व त्यांनी तो त्यातील एका अल्पवयीन मुलीला दाखवून तिच्या मनात लज्जा उत्पन्न होईल, असे वर्तन केले.
याबाबतची फिर्याद पीडित मुलीच्या आईने दिली आहे. त्यानुसार या प्रकरणी दोन अल्पवयीन मुलांसह एकूण पाच जणांवर पारगाव कारखाना पोलिस ठाण्यात गुन्हा दाखल केला आहे. याबाबत पोलिसांनी माहिती दिली की, पारगाव पोलिस ठाण्याच्या हद्दीत असलेल्या एका गावात दोन अल्पवयीन सख्ख्या मावस बहिणी घरात एकट्या असताना अवधूत राजू पंचरास व कुणाल कैलास बोऱ्हाडे आणि दोन अल्पवयीन मुलांनी घरात घुसून दरवाजाला आतून कडी लावून जीवे मारण्याची धमकी देत त्यांच्यावर सामूहिक बलात्कार केला. तसेच, या आरोपींनी मुलींवर केलेल्या अत्याचाराचा व्हिडिओ तयार करून तो महेश सुभाष तांबे याला दिला. त्यानंतर महेश याने तो त्यातील एका मुलीला दाखवून तिच्या मनात लज्जा उत्पन्न होईल, असे वर्तन केले. त्यामुळे त्याच्यावरही गुन्हा दाखल केला. पोलिसांनी यातील काही संशयितांना ताब्यात घेतले आहे. याबाबतचा पुढील तपास मंचर पोलिस ठाण्याचे पोलिस निरीक्षक अरुण फुगे व पारगाव पोलिस करत आहे.