आळेफाटा, ता. १८ : पिंपळवंडी (ता. जुन्नर) येथून बेपत्ता झालेल्या एका अल्पवयीन मुलीचा मृतदेह मंगळवारी (ता. १८) रात्री साडेनऊच्या सुमारास ओढ्याकाठी आढळला. या घटनेमुळे परिसरात खळबळ उडाली आहे. तर मुलीच्या मृत्यूचे नेमके कारण रात्री उशिरापर्यंत समजू शकलेले नव्हते.
अधिक माहितीनुसार, पिंपळवंडी येथील ही मुलगी मंगळवारी दुपारी चार वाजेपासून बेपत्ता होती. तिच्या घरच्यांनी आळेफाटा पोलिस ठाण्यात तक्रार दाखल केली होती. पोलिसांनी तातडीने शोधमोहीम राबवली असता, लेंडेस्थळ येथील ओढ्याच्या कडेला झाडाझुडपात तिचा मृतदेह सापडला. दरम्यान, या मृत्यूमागे काही घातपात आहे का?, यादृष्टीने पोलिस तपास करीत आहेत. उपविभागीय पोलिस अधिकारी धनंजय पाटील यांच्या मार्गदर्शनाखाली पोलिस निरीक्षक विश्वास जाधव पुढील तपास करत आहेत.