पुणे : भारतीय छात्र संसद फाउंडेशन, एमआयटी स्कूल ऑफ गव्हर्नमेंट आणि एमआयटी वर्ल्ड पीस युनिव्हर्सिटी यांच्या वतीने ‘अकराव्या भारतीय छात्र संसदे’चे आयोजन २३ ते २८ सप्टेंबर दरम्यान ऑनलाइन करण्यात आले आहे. याचे उद्‌घाटन केंद्रीय संरक्षण मंत्री राजनाथ सिंह यांच्या प्रमुख उपस्थितीत २३ सप्टेंबरला सकाळी ११ वाजता होईल, असे ‘एमआयटी’चे कार्याध्यक्ष राहुल विश्‍वनाथ कराड यांनी पत्रकार परिषदेत सांगितले.

केंद्रीय क्रीडा व युवक कल्याण मंत्रालय आणि असोसिएशन ऑफ इंडियन युनिर्व्हर्सिटीज आणि युनेस्को यांच्या मदतीने ही छात्र संसद होत आहे. तर ‘छात्र संसदे’च्या समारोपप्रसंगी केंद्रीय आरोग्य आणि कुटुंब कल्याण मंत्री मनसुख मांडविया हे उपस्थित असणार आहेत.

‘छात्र संसदे’मध्ये यंदा केंद्रीय रस्ते वाहतूक मंत्री नितीन गडकरी, ज्येष्ठ पत्रकार मार्क टुली, कॉग्रेसचे ज्येष्ठ नेते रशीद अल्वी, केरळ विधानसभेचे सभापती एम. बी. राजेश, केंद्रीय वाणिज्य आणि उद्योग राज्यमंत्री अनुप्रिया पटेल, जागतिक आरोग्य संघटनेचे मुख्य संशोधक सोमय्या स्वामिनाथन यांसह राष्ट्रीय पातळीवरील मान्यवर संवाद साधणार आहेत. यात सहभागी होण्यासाठी विद्यार्थ्यांनी ‘www.bhartiyachhatrasansad.org’ नोंदणी करावी, असे आवाहन एमआयटीतर्फे करण्यात आले आहे.

‘छात्र संसदे’च्या पार्श्वभूमीवर घेतलेल्या पत्रकार परिषदेत ‘एमआयटी’चे संस्थापक अध्यक्ष डॉ. विश्‍वनाथ कराड, एमआयटी वर्ल्ड पीस युनिव्हर्सिटी’चे प्रभारी कुलगुरू डॉ. आर. एम. चिटणीस, भारतीय छात्र संसदचे समन्वयक रवींद्रनाथ पाटील आदी मान्यवर उपस्थित होते.