धनकवडी (पुणे) : स्वारगेट चौकातील मेट्रो स्थानकाचे खोदकामातील रसायन मिश्रित सांडपाणी मुठा उजवा कालव्यात सोडल्या प्रकरणी फौजदारी कारवाई व्हावी, अशी मागणी खडकवासला विधानसभा मतदारसंघाचे आमदार भीमराव तापकीर यांनी राज्य जलसंपदामंत्री जयंत पाटील यांना निवेदनाद्वारे केली.

- कांबळेने मित्राच्या मदतीने केला मारटकर याचा खून; चौघांची पोलिस कोठडीत रवानगी​

पुण्यातील स्वारगेटच्या जेधे चौकात एस. टी. स्थानकाच्या भागात मेट्रो स्थानकाचे खोदकाम सुरू आहे. या कामाचे महामेट्रोचे कंत्राटदार टाटा-गुलेरमार्ग आणि जे. कुमार इन्फ्रा यांच्याकडून खोदाई दरम्यान निघालेले रसायन मिश्रित सांडपाणी मुठा कालव्यात बेकायदा सोडण्यात आले आहे. या कालव्याचे पाणी दौंड, इंदापूर भागातील शेतकरी शेती आणि पिण्यासाठी वापरत असल्याने या घटनेमुळे त्या भागातील नागरिकांचे आरोग्य धोक्यात आले आहे.

अद्यापही खोदकामातील रसायनमिश्रित पाणी पाईपलाईनद्वारे मुठा उजवा कालव्यात सोडण्यात येत आहे. याप्रकरणी पुणे पाटबंधारे शाखेच्या सहाय्यक अभियंत्यांनी दोन्ही कंत्राटदारांना नाममात्र प्रत्येकी १५०० रुपये दंड आकारला आहे. ही बाब गंभीर असून याप्रकरणी कंत्राटदारांकडून शेतकरी,
नागरिकांच्या जीवाशी खेळण्याचा गंभीर प्रकार घडत असताना आपल्या स्तरावर तात्काळ फौजदारी कारवाई करावी, असे तापकीर यांनी सांगितले.

- पुण्यात पोलिस आयुक्तालयापासून अवघ्या हाकेच्या अंतरावरच गोळीबार करून खून

तापकीर म्हणाले, ''दूषित पाणी कॅनॉलमध्ये न सोडता महापालिकेच्या पावसाळी लाईनद्वारे सोडले असते, तर कॅनॉल दूषित झाले नसते. खोदकामातील रसायनमिश्रित पाणी थेट पाईपलाईनद्वारे मुठा उजवा कालव्यात सोडण्यात येत आहे. हेच पाणी शेतकरी पिण्यासाठी, शेतीसाठी वापरत आहेत. पाटबंधारे विभागाने नुसता दंड आकारून प्रश्न सुटणार नाही, त्यासाठी योग्य ते व्यवस्थापन करावे.''

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)