राज्यभरात मनसेने पुकारलेल्या भोंग्यांच्या आंदोलनावरुन वातावरण तापलं आहे. राज ठाकरे यांनी मुंबई, ठाणे आणि औरंगाबादमध्ये केलेल्या भाषणांमध्ये इशारा दिल्याने यात आणखी भर पडली. ठाकरे यांनी पुण्यात महाआरती केली होती. या कार्यक्रमांना वसंत मोरे यांची उपस्थिती दिसली नाही. मोरे नाराज असल्याच्या बातम्या कायम चर्चेत राहिल्या. (Vasant More News)

मात्र, मोरेंनी यावर स्पष्टीकरण देणं टाळलं. त्यांच्या फेसबूक पोस्ट मार्फत त्यांनी बाजू मांडण्याचा प्रयत्नही केला. त्यांना मुख्यमंत्री उद्धव ठाकरे यांनी फोनही केला होता. मोरे अन्य कोणत्या पक्षात जाणार का, याकडे सर्वांचं लक्ष्य लागलं होतं. अखेर त्यांनी राज ठाकरेंची भेट घेऊन या प्रकरणावर पडदा टाकला. मात्र,त्यानंतरही मोरेंच्या सोशल मीडिया पोस्टवरून वादंग कायम आहे. यानंतर आज संजय राऊत पुण्यात आले होते. यावेळी वसंत मोरे यांनी राऊतांची भेट घेतली. (Vasant More meets Sanjay Raut)

मनसेत नाराज असलेल्या वसंत मोरे यांनी खासदार संजय राऊत यांच्या भेटीनंतर चर्चांना उधाण आलं आहे. संजय राऊत यांनी वसंत मोरेंच्या कामाचं कौतुक केलं. पुण्यातील एका लग्नात दोघांची भेट झाली.

पुण्याचे सेनेचे शहराध्यक्ष लग्नात उपस्थित होते. त्यांनी वसंत मोरे यांची राऊतांसोबत भेट घडवून आणली. यावेळी ओळख करून देताना संजय राऊत यांनी मोरेंचं ठाण्यातील भाषण ऐकल्याचं सांगितलं. वसंत मोरे म्हणून नाही, तर तात्या म्हणून ओळखलं, असं राऊत म्हणाले. जाता जाता संजय राऊत मोरे यांना 'भेटू' असं म्हणाले. त्यामुळे मोरे आता शिवसेनेच्या जवळ आल्याची चर्चा आहे. याआधीही मोरेंना मुख्यमंत्र्यांचा फोन आल्याने राजकीय वर्तुळात चर्चा होत्या.