पुणे : रस्त्याने जाताना रागाने बघितल्याचा जाब विचारल्याचा राग आल्याने तरुणासह टोळक्‍याने दोन तरुणांवर कोयत्याने वार केले. याबरोबरच मोठमोठ्याने आरडाओरडा करीत, शस्त्रे हवेमध्ये फिरवून दहशत निर्माण केली. हि घटना गुरूवारी रात्री साडे बारा वाजण्याच्या सुमारास लोहियानगर येथील श्रीनाथ डेअरीसमोर घडली. जुबेर ऊर्फ वडी मुश्‍ताक शेख (वय 20, रा. लोहियानगर), आकीब आसद दुल्लाह शेख (वय 21, रा.कोंढवा) यांच्यासह चौघांविरुद्ध कोंढवा पोलिस ठाण्यात गुन्हा दाखल करण्यात आला आहे. (Pune News)

याप्रकरणी फैजान शेख (वय 23, रा.मीठानगर, कोंढवा) यांनी फिर्याद दिली आहे. पोलिसांनी दिलेल्या माहितीनुसार, फिर्यादी व त्यांचे मित्र गुरूवारी रात्री साडे बारा वाजण्याच्या सुमारास लोहियानगरमधील श्रीनाथ डेअरीसमोर गप्पा मारत थांबले होते. त्यावेळी तेथून जाणार जुबेर शेख हा फिर्यादीकडे रागाने बघत जात होता. फिर्यादीने त्यास रागाने बघितल्याचा जाब विचारला. त्यावेळी जुबेरने त्याच्या साथीदारांना बोलावून फिर्यादीवर कोयत्याने वार केले. त्यानंतर फिर्यादीचा मित्र सलमान याच्यावरही वार केले. या घटनेत दोघेही गंभीर जखमी झाले. आरोपींनी तेथून पळून जाताना मोठमोठ्याने आरडाओरडा करीत तसेच त्यांच्याकडील शस्त्रे हवेत फिरवून दहशत निर्माण केली. या प्रकरणाचा तपास सहाय्यक पोलिस निरीक्षक व्ही.एस.जाधव करीत आहेत.