पुणे - ऑनलाइन रक्कम दिल्यानंतरही ग्राहकाने दिलेला धनादेश जस्ट डायल कंपनीने बॅंकेत जमा केला. तो धनादेश न वटल्याने ग्राहकांचे झालेले नुकसान भरून देण्यासह जाहिरातीचे पैसेही तक्रारदाराला परत करण्याचा आदेश ग्राहक आयोगाने जस्ट डायल कंपनीला दिला आहे. 

ग्राहकाकडून सेवेपोटी घेतलेले तीन हजार 540 रुपये, तक्रारदाराला झालेल्या शारीरिक आणि मानसिक त्रासापोटी एक हजार रुपये आणि तक्रारीचा खर्च म्हणून 500 रुपये देण्यात यावेत, असा आदेश ग्राहक आयोगाने "जस्ट डायल'ला दिला आहे. अतिरिक्त जिल्हा ग्राहक तक्रार निवारण न्याय आयोगाचे अध्यक्ष जे. व्ही. देशमुख, सदस्य शुभांगी दुनाखे, सदस्य अनिल जवळेकर यांनी हा निकाल दिला. 

ताज्या बातम्यांसाठी डाऊनलोड करा ई-सकाळचे ऍप

याप्रकरणी सचिन चंद्रकांत पेंढारे (रा. कात्रज-कोंढवा रस्ता) यांनी ग्राहक आयोगात तक्रार केली होती. पेंढारे यांनी "जस्ट डायल लिमिटेड' व "जस्ट डायल'चे संस्थापक-संचालक व्ही. एस. एस. मणी यांच्याविरुद्ध तक्रार दिली होती. व्यवसायाची जाहिरात करण्यासाठी कंपनीच्या प्रतिनिधीने पेंढारे यांच्याशी संपर्क साधून त्यांना नोंदणी करण्याबाबत सुचविले. त्यानुसार त्यांनी एक वर्षासाठी जाहिरातीचा प्लॅन घेण्याचे ठरविले. त्यांची तीन महिन्याची ऍडव्हान्स रक्कम म्हणून तीन हजार 540 रुपयांचा धनादेश कंपनीला दिला. मात्र, धनादेश देताना त्यांनी संबंधित प्रतिनिधीला सूचना दिली होती की, ऍडव्हान्सची रक्कम ते "जस्ट डायल'च्या खात्यात ऑनलाइन भरणार आहेत. त्याप्रमाणे त्यांनी मार्च 2018 रोजी हे पैसे भरले. मात्र, तरीही त्यांनी दिलेला धनादेश कंपनीने बॅंकेत टाकला. 

पुण्याच्या बातम्या वाचण्यासाठी येथे ► क्लिक करा

दरम्यान, पेंढारे यांच्या खात्यात पुरेशी रक्कम नसल्यामुळे तो धनादेश वटला नाही. हा प्रकार तीनदा झाल्याने तक्रारदारांनाच्या खात्यातून एकूण 954 रुपयांची कपात करण्यात आली.