पुणे - मॉन्सूनच्या आगमनाची पुणेकरांना प्रतिक्षाच करावी लागणार आहे. पोषक वातावरण असले तरी अजूनही मॉन्सूनची पाहिजे तशी प्रगती झालेली नाही. त्यामुळे पुढील दोन दिवस तरी शहरात आकाश अंशतः ढगाळ राहील तर तुरळक ठिकाणी हलक्या स्वरूपाच्या पावसाची शक्यता हवामान खात्याने वर्तवली आहे.

बुधवारी शहरात दिवसभर ढगाळ हवामान असले तरी काहीसा उकाडा जाणवत होता. कडाक्याचे ऊन नसले तरी सरासरी कमाल तापमान ३५ अंश सेल्सिअस नोंदविले गेले. राज्यातही मॉन्सूनचे लांबलेले आगमन, पूर्वमोसमी पावसाची दडी व उन्हाच्या वाढलेल्या झळा यामुळे पावसाची जोरदार प्रतीक्षा आहे.

गुरुवारपासून (ता. २२) कोकणात पावसाला सुरवात होईल. तुरळक ठिकाणी जोरदार पावसाचा अंदाज आहे. विदर्भात वादळी पावसासह तुरळक ठिकाणी उष्णतेच्या लाटेचा इशारा आहे. पावसाला पोषक हवामान होताच, पूर्वमोसमीचे ढग गोळा होऊ लागले आहेत.

मॉन्सूनची प्रगती ‘जैसे थे’....

आठवडाभरापासून थांबलेली मॉन्सूनची वाटचाल सोमवारी (ता. १९) पुन्हा सुरू झाली. कर्नाटक, आंध्र प्रदेशचा आणखी काही भाग, पश्चिम बंगाल, झारखंड आणि बिहार राज्याच्या काही भागात मॉन्सूनने आगेकूच केली.

बुधवारी (ता. २१) मॉन्सूनने कोणतीही प्रगती केली नाही. शनिवारपर्यंत (ता. २४) दक्षिण द्वीपकल्पाचा आणखी काही भाग, पश्चिम बंगाल, झारखंड, बिहारचा आणखी काही भाग, तसेच ओडिशा आणि पूर्व उत्तर प्रदेशच्या काही भागात मॉन्सूनची प्रगती होण्याची शक्यता आहे.