निरगुडसर - आई वडील मजूर, निवाऱ्यासाठी घर नाही, अभ्यासासाठी वीज नाही फक्त तात्पुरत्या निवाऱ्यासाठी पाल तयार केले आहे. अशा परिस्थितीत आंबेगाव तालुक्यातील शिंगवे येथील जिल्हा परिषद प्राथमिक शाळेतील आर्यन विजय चव्हाण यांची नवोदय विद्यालयात पुढील शिक्षणासाठी निवड झाली आहे. त्यामुळे जिद्द,चिकाटी असेल तर आपण कोणत्याही परिस्थितीवर मात करू शकतो हे गरीब कुटुंबातील आर्यनने दाखवून दिले आहे.

शिंगवे (ता. आंबेगाव) येथील जिल्हा परिषद प्राथमिक शाळेतील आर्यन विजय चव्हाण या विद्यार्थ्यांची नवोदय विद्यालयात निवड झाली आहे, इयत्ता पाचवीत असताना आर्यन चव्हाणने हे यश अत्यंत प्रतिकूल परिस्थितीत मिळल्यामुळे शिंगवे व परिसरातून आर्यनचे कौतुक होत आहे.

शिंगवे जिल्हा परिषद प्राथमिक शाळेच्या इमारतीच्या पाठीमागे मुळचे सोलापूर जिल्ह्यातील चव्हाण कुटूंब गेली अनेक वर्षांपासून वास्तव्यास आहे,आर्यनचे वडील विजय चव्हाण हे गवंडी काम करतात. तर आई शेतांमध्ये मोल मजुरीचे काम करते. शाळेच्या इमारतीच्या पाठीमागे त्यांनी राहण्यासाठी पाल तयार केले आहे.पालामध्ये वीजेची व्यवस्था देखील नाही अशा अत्यंत प्रतिकूल परिस्थितीमध्ये देखील आर्यनने हे दैदिप्यमान यश मिळवले. इयत्ता पाचवीतून त्याचे आता पिंपळे जगताप येथील नवोदय विद्यालयात निवड झाली आहे.

आर्यन चव्हाण याला वर्गशिक्षिका सुषमा कदम यांचे बहुमोल मार्गदर्शन लाभले. जिल्हा परिषद प्राथमिक शाळेचे मुख्याध्यापक सुरेश लोहकरे व शिक्षकांनी त्याचा पालाकडे जाऊन आर्यन व त्याच्या आई वडीलांचा सत्कार केला.

अत्यंत गरीब कुटुंबात जन्मलेला आर्यन खूप हुशार विद्यार्थी असून आर्यन याने नवोदय परिक्षेबरोबर मंथन,प्रश्नमंजुषा,अभिरूप परिक्षेत त्याने यश मिळविले आहे.तो अभ्यासाबरोबरच कबड्डी खेळ ही चांगला खेळतो. शाळेच्या प्रत्येक उपक्रमात त्याचा सहभाग असतो.फोटो खाली ओळ: शिंगवे (ता.आंबेगाव): पालात राहणाऱ्या आर्यन चव्हाणची नवोदय विद्यालयात निवड झाल्याबद्दल त्याचा आणि आई वडील यांचा सत्कार करताना शिक्षक वृंद.