हडपसर - स्वराज्यरक्षक छत्रपती संभाजी महाराजांचा जाज्वल्य व तेजस्वी इतिहास उलगडून दाखविणारे 'शिवपुत्र संभाजी' महानाट्य पाहण्याची संधी हडपसर परिसरातील नागरिकांना मिळणार आहे. खासदार डॉ. अमोल कोल्हे स्वत: शिवपुत्र संभाजी महाराजांच्या भूमिकेतून हा शौर्यपट आपल्यासमोर उलगडणार असून त्यांच्या "जगदंब प्रतिष्ठान' च्या वतीने तीन दिवस प्रेक्षकांना त्याची मोफत पर्वणी घेता येणार आहे.

या महानाट्याचे तीनही दिवसांचे प्रयोग विनामूल्य आहेत. येत्या ९ ते ११ मार्च दरम्यान मुंढवा रेल्वे पुलाशेजारी सायंकाळी ६ ते १० या वेळेत हे प्रयोग होणार आहेत. खासदार डॉ. कोल्हे यांनी साकारलेली छत्रपती शंभुराजांची करारी व तडफदार भूमिका व त्यांची प्रेक्षकांमधील चित्तथरारक घोडेस्वारी, नेत्रदीपक राज्याभिषेक सोहळा, त्यावेळची आतिषबाजी, तडाखेबाज संवाद, किल्ल्याचा तीन मजली भव्य रंगमंच, दीडशे कलाकार, २२ फुटी जहाजावरून केलेली जंजिरा मोहीम, शंभुराजे आणि अनाजीपंतांची जुगलबंदी, थेट प्रेक्षकांमधून गनिमी काव्याने केली जाणारी बुऱ्हाणपूर मोहीम, जिवंत तोफा ही या महानाट्याची वैशिष्ट्ये आहेत.

'भोसरी व त्यापाठोपाठ अहमदनगर येथे झालेल्या या नाटकाच्या प्रयोगांना नागरिकांनी उत्स्फूर्त प्रतिसाद दिला. हडपसर येथे प्रथमच होत असलेल्या या महानाट्याबद्दल नागरीकांमध्ये उत्सुकता आहे. कात्रज, कोंढवा, एनआयबीएम, मांजरी, साडेसतरानळी, केशवनगर मुंढवा, महंमदवाडीसह संपूर्ण पंचक्रोशीतील नागरिकांनी या महानाट्य रोमांचकारी अनुभव घ्यावा,' असे आवाहन खासदार डॉ. कोल्हे यांनी केले आहे.