झोपलेल्या प्रवाशाचा ६७ हजारांचा मोबाईल लंपास
कुर्डुवाडी, ता. २२ ः प्रवासी झोपल्याचा गैरफायदा घेत चोरट्याने मुंबई-लातूर एक्स्प्रेसमधील प्रवाशाचा ६७ हजार रुपये किमतीचा मोबाइल लंपास केला. ही घटना शुक्रवारी (ता. २१) रात्री दौंड ते बार्शी रेल्वेस्थानकादरम्यान घडली.
कोमेश हर्षवर्धन कसबे (रा. वडवळ नागनाथ, ता. चाकूर) यांनी याबाबत कुर्डुवाडी रेल्वे पोलिसांत फिर्याद दिली आहे. फिर्यादी मुंबई-लातूर (२२१०७) एक्स्प्रेसच्या सर्वसाधारण डब्यातून मुंबईहून गावी प्रवास करत होते. गाडी दौंड येथे आल्यानंतर त्यांनी मोबाइल चार्जिंगला लावून सीटवर झोप घेतली. गाडी बार्शी रेल्वेस्थानकाजवळ आल्यानंतर त्यांना जाग आली. त्यावेळी मोबाइल चोरीला गेल्याचे त्यांच्या लक्षात आले. या प्रकरणाचा तपास पोलिस हवालदार श्री. खताळ करीत आहेत.