पुणे : महापालिकेच्या विविध दवाखान्यात कंत्राटी पद्धतीने क्षयरोग निर्मूलन कार्यक्रमांतर्गत काम करणाऱ्या ५९ कर्मचाऱ्यांना जोखीम भत्ता न मिळाल्याने, आज सर्व कर्मचाऱ्यांनी काळ्या फिती लावून प्रशासनाचा निषेध म्हणून काम केले. जोखीम भत्ता न मिळाल्यास मंगळवार (ता:२८) फेब्रुवारी पर्यंत हे आंदोलन सुरू ठेवले जाणार आहे.

तरी देखील न्याय न मिळाला तर, एक मार्च पासून असहकार आंदोलन करणार असल्याचे महाराष्ट्र राज्य सुधारित राष्ट्रीय क्षयरोग नियंत्रण कर्मचारी संघटना पुणे महापालिका यांनी शहर क्षयरोग अधिकारी महापालिका यांना दिलेल्या निवेदनात म्हटले आहे . महापालिकेच्या २०२१ साली झालेल्या स्थायी समितीच्या ठरावात संबंधित कर्मचाऱ्यांना सदोतीस लाख ऐंशी हजार रूपये अनुदान मंजूर करण्यात आले आहे.

तरी देखील हे अनुदान मिळत नसल्याने कर्मचाऱ्यांवर आंदोलन करण्याची वेळ आली. कर्मचाऱ्यांना जोखीम भत्ता मिळावा यासाठी आरोग्य मंत्री तानाजी सावंत यांनी देखील महापालिकेच्या अधिकाऱ्यांना बैठकीत निर्देश दिले आहेत. मात्र महापालिका प्रशासन याकडे दुर्लक्ष करत असल्याचे दिसते.