सिंहगड रस्ता - पावसामुळे शनिवारच्या रात्रीपासून आम्ही पाण्यात आहोत. महापालिकेच्या उदासीन कारभारामुळे ही परिस्थिती आमच्यावर ओढावली आहे, असा संताप एकतानगरी परिसरातील महिलांनी ‘सकाळ’शी बोलताना व्यक्त केला.

या परिसरात राहणाऱ्या स्नेहल केसकर, उमा दांडेकर, स्मिता पाटील, ज्योती भोळे, नंदा कांबळे, कावेरी जगताप, सुरेखा पिंगळे यांनी आपली व्यथा मांडली. त्या म्हणाल्या, ‘‘आमच्याकडे वीज नाही. याला केवळ महापालिका जवाबदार आहे. महापालिकेच्या नाकर्तेपणाची शिक्षा आम्ही भोगत असून, आज आम्हाला पाण्यात आणि काळोख्या अंधारात रात्र काढावी लागत आहे. जीव टांगणीला लागला आहे. आमची ही हानी कोण भरून देणार?’’ 

 या परिसरात शारदा सरोवर, शामसुंदर, जलपूजन, जलतरंग, जलविहार, द्वारका, साईसिद्धार्थ, आनंद पार्क, राज अपार्टमेंट, कुदळे पाटील गार्डन, राधाकृष्ण रेसिडेन्सी, पूजा पार्क आदी सोसायट्या आहेत. सर्व सोसायट्यांत मिळून सुमारे ४५० कुटुंबे आहेत. ‘‘या परिसरात विठ्ठलवाडी वारजे नदीकाठचा रस्ता करण्यात आला होता. या रस्त्याचा भराव काढण्याचा आदेश राष्ट्रीय हरित लवादाने दिला. त्यानुसार महापालिकेने रस्ता उखडला. मात्र, त्याचा सुमारे तीस टक्के राडारोडा उचलून न नेता तो नदीपात्राच्या बाजूलाच टाकला. तोच राडारोडा सोसायट्यांच्या बाजूने टाकला गेला असता तर आज परिसरात पाणी शिरले नसते. त्या राडारोड्यामुळे नदीपात्रातील पाणी अडविले गेले. परिणामी, नागरिकांच्या घरात पाणी शिरण्यास सुरवात झाली आहे,’’ असेही या महिलांनी सांगितले. 

नदीपात्रात राडारोडा टाकल्यानेच ही परिस्थिती ओढावली आहे. वेळोवेळी अधिकाऱ्यांना पत्र देऊन माहिती दिली, तरीही कोणतीही कार्यवाही झाली नाही. भविष्यात पुन्हा अशी परिस्थिती उद्‌भवू नये म्हणून परिसरात संरक्षक भिंत घालून द्यावी.
- सोमनाथ गिरी, अध्यक्ष, एकतानगरी रहिवासी संघ