पुणे : पुणे महापालिकेत (Pune Municipal Corporation) समाविष्ट झालेल्या जिल्हा परिषद (Zilla Parishad) कार्यक्षेत्रातील ३८ गावांमधील ५८६ शिक्षकांसह विविध शिक्षक संघटनांनी जिल्हा परिषदेच्या वतीने सोमवारी (ता.१७) आयोजित केलेल्या शिक्षक समायोजन प्रक्रियेवर बहिष्कार टाकला. यामुळे सोमवारची शिक्षक समायोजनेची पुर्वनियोजित प्रक्रिया सुरू होऊ शकली नाही. विद्यार्थ्यांचेtudent) शैक्षणिक नुकसान टाळण्यासाठी चालू शैक्षणिक वर्ष संपल्यानंतर हे समायोजन करावे, अशी मागणी यावेळी शिक्षकांनी केली.

जिल्हा परिषद कार्यक्षेत्रातून पुणे महापालिकेत समाविष्ट झालेल्या ३८ गावांमधील ५८६ शिक्षकांचे जिल्हा परिषदेच्या अन्य शाळांमध्ये समायोजन करण्याचा निर्णय जिल्हा परिषद प्रशासनाने घेतला होता. या निर्णयानुसार या सर्व शिक्षकांना सोमवारी एकाच वेळी जिल्हा परिषदेच्या मुख्यालयात बोलाविण्यात आले होते.

सध्या चालू शैक्षणिक वर्ष मध्यावर आले आहे. अशा स्थितीत शिक्षकांचे केले जाणारे हे समायोजन विद्यार्थ्यांवर अन्याय करणारे आहे. त्यामुळे तुर्तास हे समायोजन केले जाऊ नये, अशी मागणी यावेळी सर्व शिक्षक संघटना आणि उपस्थित शिक्षकांनी केली.

महापालिका प्रशासनाने अद्याप या शाळांवर पालिकेच्या शिक्षकांच्या नियुक्त्या केलेल्या नाहीत. त्यातच सध्या या शाळांवर कार्यरत असलेले शिक्षक अन्यत्र हलविण्यास, शैक्षणिक वर्षाच्या मध्यावर या शाळांमधील विद्यार्थ्यांच्या शिक्षणाचा खेळखंडोबा होणार असल्याचे या शिक्षकांचे म्हणणे आहे. या सर्व गावांमधून मिळून सुमारे ३० हजार विद्यार्थी शिक्षण घेत आहेत.