पुणे - पुणे जिल्ह्यातील मोठ्या गावांमध्ये नमामि चंद्रभागा अभियान राबविण्याचा आदेश विभागीय आयुक्त सौरभ राव यांनी जिल्हा परिषद प्रशासनाला दिला आहे. या अभियानासाठी जिल्ह्यातील नदीकाठच्या किमान दहा हजार लोकसंख्या असलेल्या ३३ गावांची निवड करण्यात आली आहे. निवड करण्यात आलेल्या गावांमध्ये भीमा, भामा, इंद्रायणी, पवना, मुळा, मांडवी, कुकडी, वेळ, मुळा-मुठा आदी नद्यांच्या काठावरील गावांचा समावेश आहे. या गावांमध्ये नदीपात्राच्या शेजारी सांडपाणी व घनकचरा व्यवस्थापन प्रकल्प उभारण्यात येणार आहेत.

नमामि चंद्रभागा या प्रकल्पासाठी दौंड, हवेली, इंदापूर, जुन्नर, खेड, मावळ, मुळशी आणि शिरूर या आठ तालुक्यांतील गावांची निवड करण्यात आली आहे. जिल्हा पाणी व स्वच्छता मिशन कक्षाच्यावतीने या प्रकल्पाची अंमलबजावणी केली जाणार आहे. यासाठी केंद्र आणि राज्य सरकार प्रत्येकी ५० टक्के निधी उपलब्ध करून देणार आहे. तसेच पंधराव्या वित्त आयोगाच्या निधीचाही वापर करता येणार आहे. शिवाय या प्रकल्पासाठीचे गाव आणि प्रकल्पनिहाय प्रकल्प अहवाल (डीपीआर) तयार करून, या प्रकल्प अहवालांना तांत्रिक मान्यता घेण्याचा आदेश या तालुक्याच्या सर्व गट विकास अधिकाऱ्यांना देण्यात आला आहे.

या प्रकल्पासाठी कोरेगाव भीमा, मांडवगण फराटा, शिक्रापूर, सणसवाडी व तळेगाव ढमढेरे (सर्व ता. शिरूर), राहू, पाटस, कुरकुंभ, यवत, केडगाव, वरवंड (सर्व ता. दौंड), भिगवण, पळसदेव (ता. इंदापूर), पेरणे, कदमवाकवस्ती, लोणी काळभोर, उरुळीकांचन, कुंजीरवाडी (ता. हवेली), नारायणगाव, वारूळवाडी, ओतूर (ता. जुन्नर), नाणेकरवाडी, मेदनकरवाडी, खराबवाडी, कडुस (ता. खेड), खडकाळे, इंदोरी, सोमाटणे, वराळे (ता. मावळ) आणि पिरंगुट, हिंजवडी, माण, भूगाव (ता. मुळशी) या गावांची निवड करण्यात आली आहे.

गाव निवडीचे निकष

- गावाची लोकसंख्या किमान दहा हजार अनिवार्य

- गाव नदीकाठावर असावे

- प्रकल्पासाठी नदीकाठावर पुरेशी जमीन उपलब्ध असावी

- उपलब्ध जमीन ही पूरक्षेत्राच्या बाहेर असणे बंधनकारक