पुणे - डॉ. भानूबेन नानावटी आर्किटेक्‍ट महाविद्यालयाच्या युनिव्हर्सल डिझाईन सेंटरला (यूडीसी) संयुक्त राष्ट्र संघाच्या वतीने गौरविण्यात आले. दिव्यांगासंबंधी केलेल्या कार्याबद्दल युनोच्या व्हियेन्ना येथील मुख्यालयात ‘ग्लोबल झिरो प्रोजेक्‍ट इनोव्हेशन प्रॅक्‍टिस ॲवॉर्ड’ने संस्थेला गौरविण्यात आले. 

ताज्या बातम्यांसाठी डाऊनलोड करा ई-सकाळचे ऍप 

महाविद्यालयाच्या प्रा. कविता मुरुगकर यांच्या नेतृत्वाने आणि प्राचार्य डॉ. अनुराग कश्‍यप यांच्या मार्गदर्शनाखाली २०१४ मध्ये या केंद्राची सुरवात करण्यात आली आहे. समाजातील दिव्यांगांची क्षमता विकास करण्यासाठी त्यांना वास्तुविशारदाचे कौशल्ये प्राप्त व्हावे, यासाठी संस्थेच्या वतीने त्यांच्यासाठी प्रशिक्षणाचे कार्यक्रम राबविण्यात येतात. एस्सेल फाउंडेशनच्या वतीने जागतिक स्तरावर दिव्यांगांच्या प्रगतीसाठी कार्य करणाऱ्या संस्थेचा २००८ पासून गौरव करण्यात येतो. संयुक्‍त राष्ट्र संघाने निश्‍चित केलेल्या मार्गदर्शक तत्त्वांवर दिव्यांगांसाठी कार्य करणाऱ्या संस्थेची अथवा व्यक्तीची या पुरस्कारासाठी निवड करण्यात येते. या वर्षी १०६ देशांतून ५०० संस्थांना झिरो प्रोजेक्‍ट ॲवॉर्डसाठी मानांकन प्राप्त झाले होते.