वादातून जावयाने
केला सासूचा खून
----
पत्नीवरही खंजरने हल्ला, नांदेड शहरातील घटना
----
नांदेड, ता. २२ : घरगुती वादातून जावयाने सासूवर खंजरने हल्ला केल्याची धक्कादायक घटना घडली. या हल्ल्यात सासूचा जागीच मृत्यू झाला, तर पत्नी गंभीर जखमी झाली. ही घटना शहरातील शहीदपुरा भागातील अबचलनगर परिसरात शनिवारी (ता. २२) सायंकाळी पाचच्या सुमारास घडली. घटनेनंतर आरोपी जावई फरार झाल्याने परिसरात खळबळ उडाली आहे.
बलजित कौर कुलदीपसिंग सिद्धू (वय ४९, रा. अबचलनगर) असे मृत महिलेचे नाव आहे. गगनसिंग गणपतसिंग ऊर्फ लक्कीसिंग मिलवाले याने घरगुती वादातून सासू बलजित कौर यांच्यावर खंजरने हल्ला केला. या हल्ल्यात त्या गंभीर जखमी होऊन जागीच मृत्युमुखी पडल्या. त्यानंतर आरोपीने पत्नी गुरुप्रीत कौर (वय ३०) हिच्यावरही खंजरने वार केले. यात गुरुप्रीत कौर गंभीर जखमी झाली असून, तिच्यावर रुग्णालयात उपचार सुरू आहेत. फरार गगनसिंगचा शोध सुरू आहे.