नसरापूर, ता. ११ : नसरापूर-वेल्हा रस्त्यावर सांगवी (ता. भोर) गावाच्या हद्दीत दोन दुचाकींची समोरासमोर धडक होऊन झालेल्या अपघातात एका तरुणाचा उपचारादरम्यान मृत्यू झाला, तर दोघे जखमी झाले. ज्ञानेश्‍वर दत्तात्रय दमिष्टे (वय २१, रा. सोनवडी, ता. भोर) असे मृत तरुणाचे नाव आहे.
याप्रकरणी बांधकाम ठेकेदार आकाश सुभाष पवार (वय २८, रा. आंबवणे, ता. राजगड) यांनी राजगड पोलिस ठाण्यात फिर्याद दिली आहे. पोलिसांनी दिलेल्या माहितीनुसार, ३० ऑगस्टला सकाळी नऊच्या सुमारास पवार यांचे कामगार दिनेश कुमार व संजय कुमार हे दुचाकीवरून (क्र. एम एच २३ बीएम ९६४७) आंबवणे येथून टापरेवाडीकडे चालले होते. सांगवी गावच्या हद्दीत ज्ञानेश्‍वर दमिष्टे याने दुचाकी (क्र. एम एच १२ बी यु ७४८२) भरधाव वेगात चालवून त्यांच्या दुचाकीला जोरदार धडक दिली. या अपघातात ज्ञानेश्‍वरच्या डोक्याला गंभीर दुखापत झाली, तर दिनेश व संजय यांच्या हातापायाला जखमा झाल्या. ज्ञानेश्‍वरचा रुग्णालयात उपचार सुरू असताना मृत्यू झाला. याप्रकरणी बुधवारी (ता. ९) राजगड पोलिस ठाण्यात गुन्हा दाखल करण्यात आला असून, पोलिस हवालदार औदुंबर अडवाल पुढील तपास करत आहेत.