पुणे - महापालिकेच्या साने गुरुजी वसाहतीतील मोडकळीस आलेल्या आणि धोकादायक झालेल्या इमारती पाडून नव्या इमारती बांधण्याचा मार्ग मोकळा झाला आहे. त्यामुळे या वसाहतीत धोकादायक घरात राहणाऱ्या रहिवाशांना नवी घरे मिळणार आहेत. पहिल्या टप्प्यात या भागात नवी इमारत बांधून शंभर घरे उपलब्ध होणार आहेत. 

या भागातील नव्या इमारतीच्या कामासाठी 18 कोटी रुपये देण्याचा निर्णय स्थायी समितीने मंगळवारी घेतला. प्रत्यक्ष बांधकाम करून लोकांना तातडीने घरे पुरविण्याच्या हालचाली महापालिकेने सुरू केल्या आहेत. महापालिकेतील चतुर्थी क्षेणी कर्मचाऱ्यांसाठी साने गुरुजी वसाहतीत 17 इमारती असून, त्यात 450 घरे आहेत. मात्र, गेल्या काही वर्षापासून 11 इमारतींची दुरवस्था झाली आहे. पावसाळ्यात काही गळती होऊन घरे धोकादायक झाली आहे. त्यामुळे अनुचित घटना घडण्याची भीती व्यक्त होत आहे. या पार्श्‍वभूमीवर या इमारती पाडून त्याच जागी नवे घरे देण्याची रहिवाशांची मागणी आहे. मात्र, राजकीय हस्तक्षेप आणि बांधा, वापरा आणि हस्तांतरित करा (बीओटी) या प्रयोगामुळे येथील घरांच्या पुनर्बांधणीची योजना रखडली आहे. गेल्या तीन वर्षात काही घरांच्या भिंतीचा भाग कोसळला, तेव्हापासून रहिवाशांनी नव्या घरांचा आग्रह धरला आणि आंदोलनाचाही पवित्रा घेतला. त्यासाठी स्थानिक नगरसेवक धीरज घाटे यांनी महापालिका आयुक्तांना पत्रही दिले. परंतु, त्यावर कार्यवाही होऊ शकली नव्हती. मात्र, त्यावर मार्ग काढत जुन्या इमारत न पाडता वसाहतीतील मोकळ्या जागेत इमारत बांधण्याचा निर्णय घेण्यात आला आहे. त्यासाठी स्थायी समितीपुढे ठेवलेला प्रस्ताव मंजूर करीत 18 कोटी रुपये देऊन बांधकाम सुरू करण्याचा निर्णय घेतला आहे. 

ताज्या बातम्यांसाठी डाऊनलोड करा ई-सकाळचे ऍप

पुण्याच्या बातम्या वाचण्यासाठी येथे ► क्लिक करा

या भागातील रहिवाशांच्या सुरक्षिततेच्या दृष्टीने नव्या योजनेला मंजुरी दिली आहे. त्यातून शंभर नवी घरे बांधली जाणार आहेत. ही घरे लवकर उभारली जातील, पावसाळ्यापूर्वी घरे बांधली जाणार आहेत. 
- धीरज घाटे, नगरसेवक