पुणे ः शहरात गेल्या दहा वर्षांपासून राबविण्यात येत असलेल्या बीआरटी प्रकल्पाचा फेरविचार करण्याचा निर्णय नवनियुक्त महापालिका आयुक्त शेखर गायकवाड यांनी अर्थसंकल्प सादर करताना सोमवारी जाहीर केला. बीआरटीमुळे वाहतूक कोंडी सुटलेली नाही, असा धक्कादायक दावा त्यांनी केला. तर, दुचाकी वाहनांना बीआरटी मार्गातून प्रवेश देण्याबाबतही त्यांनी सूतोवाच केले. तसेच आठ दिवसांत बीआरटीबाबत निर्णय जाहीर करू, असेही त्यांनी सांगितले.

शहरात बीआरटी प्रकल्पाचे काम गेल्या अनेक वर्षांपासून सुरू आहे. स्वारगेट-कात्रज, हडपसर-स्वारगेट, विश्रांतवाडी- महापालिका भवन, नगर रस्ता आदी ठिकाणी बीआरटी प्रकल्प कार्यान्वित झाला होता. यातील काही मार्गांच्या दुरुस्तीचे काम सध्या सुरू आहे. त्यासाठी केंद्र सरकारने राज्य सरकारमार्फत महापालिकेला कोट्यवधी रुपयांचा निधी दिला आहे. तर, पीएमपीनेही उजव्या बाजूला दरवाजे असलेल्या बस बीआरटी मार्गांसाठी खरेदी केल्या आहेत. मात्र, अर्थसंकल्पाचे सादरीकरण करताना, ठरवून आल्याप्रमाणे आयुक्त गायकवाड यांनी बीआरटी योजना आता कुचकामी ठरत असल्याचे सूचित केले.

पुण्यात सुरु झाले शिवभोजन? पाहा कोठे?

सातारा रस्त्यावर सध्या बीआरटी मार्गाच्या देखभाल दुरुस्तीसाठी सुमारे 100 कोटी रुपयांचा प्रकल्प सुरू आहे. या पूर्वीचे आयुक्त कुणाल कुमार यांनी सार्वजनिक वाहतूक व्यवस्था सक्षम करण्यात बीआरटी महत्त्वाची भूमिका बजावेल, असे सांगून सक्षम बीआरटीसाठी आटोकाट प्रयत्न केले होते. पिंपरी चिंचवडचे आयुक्त श्रावण हर्डिकर यांनीही त्या भागात बीआरटीला प्राधान्य दिले होते. पुण्यात 100 किलोमीटरचे बीआरटीचे जाळे निर्माण करण्याचा ठराव महापालिकेच्या सर्वसाधारण सभेने मंजूर केला आहे. तसेच पिंपरी-चिंचवडमधील बीआरटीही पुण्यातील बीआरटीला जोडण्यात आली आहे.

ताज्या बातम्यांसाठी डाऊनलोड करा ई-सकाळचे ऍप

बीआरटीबाबत गायकवाड म्हणाले, ''बीआरटी मार्गातून सलग बस गेल्या तर, बरे. परंतू सध्या सलग बस जात नाहीत. सुमारे 80 टक्के वाहने दुचाकी आहेत. त्यांना तरी बीआरटीसाठीच्या जागेतून वाहतूक करता येईल का, या बाबत तज्ज्ञांशी सल्ला मसलत केली जाईल. बीआरटीबाबत पोलिसांचे मत विचारले असता त्यांनी "सेंट्रल इन्स्टिट्यूट ऑफ रोड ट्रान्स्पोर्ट' (सीआयआरटी) या संस्थेचा सल्ला घेऊ असे म्हटले आहे. त्यानुसार आम्ही पण त्या संस्थेचा सल्ला घेऊ. तसेच तज्ज्ञांशी चर्चा करून या बाबत निर्णय घेऊ.'' बीआरटी मार्गातून दुचाकी वाहनांना प्रवेश देता येईल का, यासाठी "टेक्‍निकल' सल्ला घेऊन निर्णय जाहीर करू, असेही त्यांनी सांगितले.