पुणे - कोरोनाच्या पार्श्वभूमीवर संचारबंदीत फक्त अत्यावश्यक सेवा वगळता अन्य दुकाने बंद करण्याचे आदेश असतानाही गुटखा व सिगारेट विक्री सुरू असलेल्या एका दुकानात अंमली पदार्थ व खंडणी विरोधी पथकाने छापा घालून ९ लाख रुपयांचा मुद्देमाल जप्त केला. कल्याणीनगर येथे ही कारवाई करण्यात आली.

बातम्या ऐकण्यासाठी डाऊनलोड करा ई-सकाळचे ऍप

मानाराम नथुराम देवासी (वय ३२) असे गुन्हा दाखल झालेल्या दुकानदाराचे नाव आहे. त्याच्याविरुद्ध येरवडा पोलीस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, कोरोनामुळे शहरात संचारबंदी सुरु असून फक्त अत्यावश्यक सेवा सुरू आहेत.असे असूनही काहीजण गुटखा, तंबाखू व सिगारेट विक्रीस ठेवून त्याची जादा भावाने विक्री करत असल्याचे पोलिसांच्या निदर्शनास आले.

पुण्याच्या इतर बातम्या वाचण्यासाठी येथे ► क्लिक करा 

कल्यानीनगर येथील महेश सुपर मार्केट या दुकानात सिगारेटची विक्री केली जात असल्याची माहिती पोलीस उपनिरीक्षक निलेशकुमार महाडिक यांना मिळाली. त्यानुसार त्यांनी बनावट ग्राहक पाठवून खातरजमा केली. त्यात देवासी हा सिगारेट विकत असल्याचे दिसून आले. त्यानुसार वरिष्ठ निरीक्षक राजेंद्र मोहिते,  पथकातील संदीप साबळे, अमोल पिलानी, रमेश गरुड, मोहन येलपले यांनी  छापा टाकला. यावेळी ८ लाख ८७ हजार २५२ रुपयाची सिगारेट जप्त करण्यात आली.