बारामती - बांधकाम परवानगी घेताना व भोगवटा प्रमाणपत्र मिळविताना आवश्यक असलेले अग्निशामन दलाचे ना हरकत प्रमाणपत्र आता बारामतीतच उपलब्ध होणार आहे. क्रेडाई बारामतीचे अध्यक्ष सुरेंद्र भोईटे यांनी एका प्रसिध्दीपत्रकाद्वारे ही माहिती दिली आहे.

राज्य शासनाने बारामती नगरपालिकेचे सहायक अग्निशामन स्थानक पर्यवेक्षक पद्मनाभ कुल्लरवार यांना तात्पुरते व अंतिम ना हरकत प्रमाणपत्र देण्याचे अधिकार प्रदान केल्याने आता बारामतीकरांना या प्रमाणपत्रासाठी पुण्याला जावे लागणार नाही. या मुळे शहरातील बांधकाम व्यावसायिकांना मोठा दिलासा मिळणार आहे.

या अगोदर हे प्रमाणपत्र पीएमआरडीए यांच्याकडून घेणे बंधनकारक होते. पुण्यातील कार्यालयाकडे अगोदरच मोठा व्याप होता, त्या मुळे असे प्रमाणपत्र मिळविण्यास विलंब होत असे. आता बारामतीतच हे प्रमाणपत्र प्राप्त होईल. या मुळे वेळ, श्रम व पैसा यांची बचत होणार आहे. सर्वात महत्वाचे म्हणजे बांधकाम व्यावसायिकांना हे प्रमाणपत्र मिळविताना कमालीचा मनस्ताप व्हायचा, आता तीही अडचण दूर होईल, अशी अपेक्षा व्यक्त केली जात आहे.

बारामतीतच हे अधिकार प्राप्त होऊन प्रमाणपत्र बारामतीतच मिळावे या साठी क्रेडाईने गेले अनेक महिने पाठपुरावा केला होता. त्याला यश आल्याने आता ही गैरसोय दूर झाली आहे. पद्मनाभ कुल्लरवार यांना तात्पुरते व अंतिम ना हरकत प्रमाणपत्र देणे व अग्निशामन यंत्रणेचे लेखापरिक्षण करण्याचा (फायर ऑडीट) अधिकार प्रदान करण्यात आला आहे.