पुणे : परदेशी शिक्षण असो वा नोकरीच्या संधी... मुलाखतीला जाताना पदवीच्या सर्व वर्षाच्या गुणांचा सारांश असलेले ट्रान्सक्रिप्ट आवश्यक आहे. यासाठी सावित्रीबाई फुले पुणे विद्यापीठाने यंदा पासून गुणपत्रिकेसह ट्रान्सक्रिप्ट देण्याचा निर्णय घेतला. पहिल्या वर्षी अभियांत्रिकी आणि फार्मसीच्या विद्यार्थ्यांसाठी ही सुविधा उपलब्ध केलेली आहे, मात्र अभियांत्रिकीच्या एकाही विद्यार्थ्यांने यासाठी अर्ज न केल्याने आश्चर्य व्यक्त केले जात आहे. 

- यंदा रेल्वेमार्गांची होणार दरडींपासून सुटका; कारण 'हिल गॅंग' झालीय घाटांत अॅक्टिव्ह!

गेल्या काही वर्षात पदव्युत्तर शिक्षणासाठी परदेशी विद्यापीठांमध्ये जाण्याचा 'ट्रेंड' वाढत आहे. त्यासाठी विद्यापीठाच्या परीक्षा विभागाकडे विद्यार्थी 'ट्रान्सक्रिप्ट'साठी अर्ज करतात. अर्ज केल्यावर पंधरा दिवसांमध्ये प्रमाणपत्र विद्यार्थ्यांना मिळणे अपेक्षित आहे. मात्र मुदतीत हे प्रमाणपत्र विद्यार्थ्यांना मिळत नाही. या प्रमाणपत्रासाठी सहा महिने वाट पहावी लागत होती. वेळेत ट्रान्सक्रिप्ट मिळावे म्हणून काही विद्यार्थी न्यायालयातही गेले होते.

या नामुष्कीमुळे ट्रान्सक्रिप्ट लगेच देण्यासाठी काय करता येईल याचा विचार विद्यापीठाने केला. कुलगुरू डॉ. नितीन करमळकर यांनी व्यवस्थापन परिषद सदस्य प्राचार्य संजय चाकणे यांच्या अध्यक्षतेखाली तीन सदस्यीय समिती नेमली होती. या समितीने अभ्यास करून निकालपत्रासह ट्रान्सक्रिप्ट देण्यास हरकत नाही, असा अहवाल सादर केला होता. त्यास पुणे विद्यापीठाने मान्यता देऊन २०१९-२० च्या निकालापासून त्याची अंमलबजावणी करण्याचा निर्णय घेतला आहे. 

- पुण्यातील खासगी रुग्णांलयांची मनमानी; ज्येष्ठ नागरिकाला गमवावा लागला जीव!​

पहिल्या टप्प्यात अभियांत्रिकी व फार्मसीसाठी सुविधा

यंदा पहिल्या वर्षी अभियांत्रिकी आणि फार्मसीच्या विद्यार्थ्यांना 'ट्रान्सक्रिप्ट' देण्याचा निर्णय घेण्यात आला. त्यानुसार ऑनलाईन परीक्षा अर्ज भरताना त्यामध्येच 'ट्रान्सक्रिप्ट' हवे की नाही याबद्दल विचारणा केली जाते. ज्या विद्यार्थ्यांनी ट्रान्सक्रिप्टची मागणी केली आहे, त्यांना निकालपत्रासह मिळणार आहे. यामध्ये फार्मसीच्या २ हजार १७ विद्यार्थ्यांनी अर्ज केले आहेत, पण अभियांत्रिकीच्या एकाही विद्यार्थ्यांने अर्ज न केल्याने आश्चर्य व्यक्त केले जात आहे. 

- पुण्याच्या बातम्या वाचण्यासाठी येथे क्लिक करा

"विद्यार्थ्यांना वेळेवर ट्रान्सक्रिप्ट मिळाले पाहिजे समितीने अहवाल मांडला होता. त्यानुसार यंदा फार्मसी आणि अभियांत्रिकीच्या विद्यार्थ्यांना निकालपत्रासह ट्रान्सक्रिप्ट मिळेल. पूर्वी यासाठी अनेक महिने लागत होते, आता विद्यार्थ्यांना वाट पहावी लागणार नाही."
- प्राचार्य डाॅ. संजय चाकणे

"अंतिम वर्षाचे परीक्षा अर्ज भरतानाच ट्रान्सक्रिप्ट हवे की नाही याबाबत पर्याय दिला आहे. यंदा फार्मसीच्या २ हजार १७ विद्यार्थ्यांनी अर्ज केले आहेत, निकाल जाहीर करताना या विद्यार्थ्यांना ट्रान्सक्रिप्ट दिले जाईल. तर, अभियांत्रिकीच्या एकाही विद्यार्थ्यांने अर्ज केलेला नाही."
- डॉ. महेश काकडे, संचालक, परीक्षा व मूल्यमापन मंडळ

- ताज्या बातम्यांसाठी डाऊनलोड करा ई-सकाळचे ऍप