पुणे : लसीकरण मोहिमेतील योगदानासाठी एमआयटी विश्‍वशांती विद्यापीठाच्या लिबरल आर्ट्स विभागातर्फे दीनानाथ मंगेशकर रुग्णालयाच्या परिचारिका ललिता भोसले यांचा सत्कार करण्यात आला. भोसले व त्यांच्या सहकाऱ्यांनी मिळून शहरातील सुमारे दीड लाख व्यक्तींचे लसीकरण केले आहे. ‘‘आपण सगळेच विविध क्षेत्रात उदरनिर्वाहासाठी काम करत असतो. परंतु, आरोग्य क्षेत्रात काम करताना मानवतेची सेवा केल्याचे विशेष समाधान लाभते.

लसीकरणासारख्या राष्ट्रकार्यात आपला वाटा आहे, ही अभिमानास्पद भावना कायमच मनात राहील आणि अधिक चांगले काम करण्याची प्रेरणा देईल,’’ असे प्रतिपादन भोसले यांनी सत्काराला उत्तर देताना केले. त्यांचा सत्कार विद्यापीठाचे कुलगुरू डॉ. रविकुमार चिटणीस यांच्या हस्ते झाला. या वेळी लिबरल आर्ट्स, विधी, फाईन आर्ट्स, मीडिया आणि पत्रकारिता विभागाच्या अधिष्ठाता डॉ. अनुराधा पारासर आणि लिबरल आर्ट्स विभागाच्या प्रमुख डॉ. प्रीती जोशी उपस्थित होत्या.