शिक्रापूर (पुणे) :  परवाना नसलेल्या कंपन्यांच्या बियाण्यांपासून बनविलेली आणि वेळेआधीच तयार झालेली मिरचीची रोपे विकल्याप्रकरणी शिरूर तालुक्यातील पिंपळे जगताप येथील नर्सरी चालकाच्या विरोधात तळेगाव ढमढेरे येथील शेतकऱ्याने लढाई सुरू केली आहे. 

पुण्याच्या इतर बातम्या वाचण्यासाठी येथे क्लिक करा

तळेगाव ढमढेरे (ता. शिरूर) येथील दत्तात्रेय रमेश तोडकर यांनी चाकण- शिक्रापूर रस्त्यावरील पिंपळे जगताप येथील राहुल शिवाजी बेंडभर यांच्या तनिष्क हायटेक नर्सरीमधून मे. मोन्सॅंन्टो होल्डींग कंपनीच्या सितारा गोल्ड मिरची या वाणांची रोपे खरेदी केली होती. मात्र, लागवडीनंतर सदर रोपे भलत्याच वाणांची असल्याचे निदर्शनास आले. झाडाला आलेले मिरची फळ जाड सालीचे व दोन ते चार इंच इतक्या कमी लांबीचे आढळले. 

पुण्यात चार लाख नागरिकांना ई पास

याबाबत तोडकर यांनी कृषी विभागाकडे तक्रार केली. त्यानुसार शिरुर पंचायत समितीचे कृषी अधिकारी नीलेश बुधवंत यांनी सांगितले की, आमच्याकडे आलेल्या तक्रारीनुसार तालुका तक्रार निवारण समिती थेट तोडकर यांच्या शेतावर गेली व लागवडीची पाहणी केली. त्यात ४० ते ४५ दिवसांची तयार रोपे देण्याऐवजी २२ दिवसातच रोपे दिल्याचे समितीच्या पाहणीत निष्पन्न झाले. समितीने लगेच तनिष्क नर्सरीचीही प्रत्यक्ष पाहणी केली. त्यावेळी तेथे भाव फलक, बियाणे खरेदी साठा नोंदवही, बियाणे खरेदी व रोपांचा विक्री अहवाल आदींमध्ये त्रुटी आढळल्या. या शिवाय विक्री परवान्यामध्ये समाविष्ट नसलेल्या कंपनीच्या बियाण्यांपासून रोपे तयार करून त्याची विक्री होत असल्याचेही आढळले. हा त्रुटी अहवाल जिल्हा कृषी अधिकाऱ्यांकडे पाठविला असता तनिष्का नर्सरीचे चालक राहुल बेंडभर यांचे म्हणणे ऐकून घेतले. त्यानंतर तनिष्का नर्सरीचा परवाना रद्द केला. परवाना रद्दची कारवाई पुढील २१ दिवसांसाठी असून, नर्सरीतून कुठलीही अन्य रोपे, बियाणे विक्रीही तत्काळ बंद करण्याचे आदेश दिले. 

पंचनाम्यातच माझ्यावर अन्याय : नर्सरी चालक
याबाबत नर्सरी चालक राहुल शिवाजी बेंडभर यांनी सांगितले की, पंचनाम्यातच माझ्यावर अन्याय झाला आहे. ज्या मिरच्या चांगल्या उगवल्या आहेत, त्यांचा उल्लेखच केलेला नाही. सितारा गोल्ड वाण नाही, असा नकार कंपनीने दिलेला नाही. त्यामुळे मी कोर्टात जाणार नाही. सितारा गोल्डची डीएनए चाचणी करण्यासाठी अर्ज दिलेला आहे. तसेच, परवाना सुरू करण्यासाठी विभागीय कृषी संचालकांनी परवानगी दिलेली आहे. 

 खडकवासला धरणक्षेत्रात पावसाची विश्रांती

मला यापूर्वी टोमॅटो रोपांमध्येही तनिष्का नर्सरीने फसविले आहे. मात्र, त्यावेळी माझ्याकडे रोपे खरेदी पावती व लेखी पुरावा नव्हता. यावेळी मात्र मी जाणिवपूर्वक रोपे खरेदी पावती घेऊन लेखी पुराव्यांसह मिरचीच्या फसवणुकीची तक्रार केली. त्यामुळे तनिष्का नर्सरीवर कारवाई झाली आहे. अर्थात ही लढाई एवढ्यावरच थांबणार नाही. कारण, अशा प्रकारे शेतकऱ्यांची फसवणूक ही शेतकऱ्यांची लूटही आहे. त्यामुळे पोलिसांकडे तक्रार करणार आहे. माझी प्रत्यक्षात झालेली नुकसान आणि मानसिक छळ अशा सगळ्यांच्याच नुकसान भरपाईसाठी ग्राहक न्यायालयाकडेही दाद मागणार आहे. 
 - दत्तात्रेय तोडकर, शेतकरी, तळेगाव ढमढेरे (ता. शिरूर)