पुणे : अनोख्या कल्पनेवर सुरू केलेल्या महिलांच्या व्यवसायाला पाठबळ मिळावे. व्यवसाय वाढीसाठी त्यांना योग्य मार्गदर्शक लाभावे, या उद्देशाने ‘रोटरी क्लब ऑफ पुणे प्राइड’च्‍यावतीने आयोजित करण्यात आलेल्या ‘नर्चरिंग आत्मनिर्भर वूमन विथ नोव्हल इनिशिएटिव्ह (नवनी) या उपक्रमाची सुरवात रविवारी (ता. २७) करण्यात आली.

‘रोटरी डिस्ट्रिक्ट ३१३१’ च्या डिस्ट्रिक्ट गव्हर्नर मंजू फडके, ‘एपेटाइट फूड्स ’च्या संस्थापिका सोनाली कोचरेकर, क्लबचे अध्यक्ष सुधीर बापट, सचिव वैशाली देव, ‘घे भरारी’च्या निलम एदलाबादकर,

क्लबच्या व्यावसायिक सेवा विभागाचे संचालक हर्षवर्धन भावे, उपक्रमाचे अध्यक्ष अविनाश जोग आणि ब्रँड ॲम्बेसिडर मीनल ठिपसे यावेळी उपस्थित होत्या. उपक्रमात सहभागी झालेल्या महिला उद्योजकांची आणि त्यांना मार्गदर्शन करणाऱ्या सल्लागारांची यावेळी ओळख करून देण्यात आली.

कोचरेकर म्हणाल्या, ‘‘नोकरी सोडून व्यवसाय सुरू करणे हे माझ्यासह अनेकांच्या कुटुंबातील सदस्यांना धोका पत्करल्यासारखे वाटते. मात्र जर व्यवसायाचे योग्य व्यवस्थापन केले आणि उत्पादनांचे चांगले मार्केटिंग जमले तर नक्की व्यवसाय वृद्धी होते. व्यवसायाच्या उन्नतीसाठी पायाभूत सुविधांसह चांगल्या माणसांत देखील गुंतवणूक केली पाहिजे.

कोरोनामुळे अनेकांच्या व्यवसायाला झटका बसला, मात्र माझा व्यवसाय त्याच काळात वाढला. ग्रामीण भागातील महिलांमध्ये देखील अनेक कौशल्ये आहेत. त्यांच्या हाताला चांगली चव देखील आहे. त्यांना जर चांगली संधी मिळाली तर त्या देखील मोठ्या उद्योजक होवू शकता,’’ असा विश्‍वास त्यांनी यावेळी व्यक्त केला.

मंजू फडके म्हणाल्या, ‘‘जग बदलत असून आता व्यवसायाकडे वळण्याचे प्रमाण वाढत आहे. पूर्वी केवळ नोकरी करण्याला प्राधान्य असायचे. त्यातही सरकारी खाते, शाळा-कॉलेज आणि बँकेत रुजू होण्यासाठी प्रयत्न केले जायचे. नोकरी सोडून किंवा नोकरी करीत असताना काहीतरी वेगळे करण्यासाठी मनाचे आणि विचारांचे दरवाजे उघडले पाहिजे.

त्यानंतर सरकारच्या मदतीचे दरवाजे नक्की उघडतील. व्यवसाय सुरू केल्यानंतर स्वतःचा ब्रँड तयार करावा. तसे झाले तर यश नक्की येते.’’ सूत्रसंचालन मीनल ओरपे यांनी केले. राधा गोखले यांनी आभार मानले. ‘महिलांनी आत्मनिर्भर बनावे’ असा संदेश देणारे नृत्य नेहा मुठिया आणि त्यांच्या ग्रुपने सादर केले.