ओझर : शिरोली बुद्रुक ता. जुन्नर येथील शिवऋण संस्थेतील सर्व ४६ मनोरुग्णांना आज सोमवार ता.१८ रोजी हलविण्यात आले. ह्या संस्थेचे चालक अक्षय बोऱ्हाडे संबंधितावर विविध प्रकरण गुन्हे दाखल असल्याने ते सद्या न्यायालयीन कोठडीत आहेत. त्यांच्या अटकेनंतर येथील मनोरुग्णाच्या देखभाल योग्य प्रकारे होत नसल्याच्या तक्रारी होत्या. तसेच या दरम्यान संस्थेतील तीन मनोरुग्णांचा मृत्यू झाल्याने त्यांच्या देखभालीचा गंभीर प्रश्न झाला होता.

येथील मनोरुग्ण हलविण्याची आवश्यकता होती. धर्मादाय आयुक्तांच्या अहवालानंतर न्यायालयाच्या आदेशानुसार याबाबत महसूल व पोलीस प्रशासनाने ही कारवाई केली. येथील ४६ मनोरूग्णांची कोरोना चाचणीचा अहवाल प्राप्त झाल्यावर त्यांची रवानगी येरवडा येथील रुग्णालयात खास बसने करण्यात आली. यामध्ये ३४ पुरुष व१२ महिलांचा सामावेश आहे.

जुन्नरचे नायब तहसीलदार सचिन मुंढे, सहाय्यक पोलिस निरीक्षक सचिन शिंदे, आरोग्य अधिकारी डॉ. मच्छिंद्र भोर तसेच महसूल, पोलिस व आरोग्य या विविध विभागाच्या कर्मचाऱ्यांनी या कामी महत्वाची भूमीका बजावली. शिरोलीचे सरपंच प्रदिप थोरवे, पोलिस पाटील अमोल थोरवे, सुधीर देवणे व ग्रामस्थानी प्रशासनास सहकार्य केले.