पुणे : सोलापूर जिल्ह्याने करोना रुग्णांची संख्या पन्नाशी गाठली आहे. पण आज पर्यंत कोरोना शहरात मर्यादित असताना त्याने ग्रामीण भागात शिरकाव केला आहे. त्याला कारण आहे. मुंबई मधून एका युवकाने चालत मिळेल तसे गाडीवर प्रवास करीत सांगोला जिल्ह्यातील घेरडी गाव गाठले आणि समस्त गाव व आजूबाजूच्या परिसराला संकटात टाकले. 

संबंधित कोरोना रुग्ण हा अंधेरी मध्ये एका कंपनीमध्ये कामाला आहे. त्याने 14 एप्रिल रोजी, लॉकडाऊन मध्ये बरेच दिवस अडकल्याने त्याने पायीच घरी निघण्याचा निर्णय घेतला. मग त्याने काही अंतर पायी व मिळेल तशी गाडी यानुसार त्याने पुणे गाठले. दोन दिवस त्याने आपल्या पाहुण्याकडे पुण्यात मुक्काम ठोकला. तेथून पुन्हा काही अंतर चालत व काही अंतर मिळेल तश्‍या वाहनावर 17 एप्रिल रोजी घेरडी या गावी घर गाठले. पण ग्रामस्थांनी त्याला प्राथमिक आरोग्य केंद्रात त्याची रवानगी करून तपासणी करून घेतली. पण तपासणी मध्ये कोणतेही लक्षणे आढळली नाहीत.

23 एप्रिलला त्रास होऊ लागल्याने सोलापूरमध्ये रूगणालयात दाखल करण्यात आले होते. तेव्हा त्याची तपासणी केली असता तो कोरोना पॉझिटिव्ह आढळला. तो तरुण आल्यानंतर गावात जरी फारसा फिरला नसला तरी त्याचे चुलत भावांशी व घरच्यांशी संबंध आल्यामुळे ते लोक फिरत होते. एक भाऊ बॅंकेत कामाला आहे व चुलते पोस्टमन आहेत. त्यामुळे त्यांचे सहाजिकच त्यांचा गावातील व इतर भागातील समाजाशी संपर्क आलेला आहे. त्यामुळे गावात चिंतेचे वातावरण आहे.

रुग्णाशी आलेल्या संपर्कातील लोकांचा शोध सुरू आहे. पण तो अनेक अनोळखी लोकांच्या संपर्कात आल्याने त्यांना शोधून काढणे म्हणजे जिकरीचे काम आहे. सद्यस्थितीमध्ये घेरडी या गावच्या सीमा सील केल्या आहेत.