पुणे : शहरी गरीब योजनेतील एजंटगिरी रोखता यावी यासाठी कार्ड काढण्याची प्रक्रिया आॅनलाइन केल्यानंतर दुसऱ्याच दिवशी एका मोठ्या रुग्णालयातील कर्मचाऱ्यांनी बनावट कागदपत्र रुग्णाला उपलब्ध करून देऊन १ लाख रुपये मिळवून देण्याचा प्रयत्न केल्याचा प्रकरणाचा भांडाफोड झाला.

त्यामुळे आता या रुग्णालयाला नोटीस पाठवली जाणार आहे, अशी माहिती सूत्रांनी दिली.शहरी गरीब वैद्यकीय सहाय योजनेत १ लाखाच्या आत उत्पन्न असणाऱ्या नागरिकांना आर्थिक मदत केली जाते. त्यामुळे गरीब नागरिकांसाठी ही योजना वरदान ठरली आहे.

पण यामध्ये एजंट घुसले असून, फोटोशॉपमध्ये उत्पन्नाच्या दाखल्यावरील नावात बदल करून या योजनेचा लाभ मिळवून देत आहेत. त्याबदल्यात ठराविक रक्कम कमिशन म्हणून घेत आहेत. हे प्रकार वाढल्याने प्रशासनाने ही सर्व योजना आॅनलाइन प्रणालीमध्ये आणण्याचा निर्णय घेतला.

दोन दिवसांपासून ही आॅनलाइन सुविधा सुरू झाली. त्यावेळी एका बड्या रुग्णालयातील धक्कादायक प्रकार समोर आला. रुग्णालयातील कर्मचाऱ्यांनी रुग्णाच्या नातेवाइकांना महापालिकेच्या योजनेतून १ लाख रुपये मिळवून देतो. त्यासाठी काही टक्के कमिशन द्यावे लागले असे सांगितले.

त्यानंतर रुग्णालयाकडे असलेल्या उत्पन्नाच्या दाखल्यासह इतर कागदपत्र जोडून महापालिकेकडे पाठवले. पण कागदपत्रांची पडताळणी करताना हा प्रकार समोर आला. संबंधित रुग्णाकडे चौकशी केल्यानंतर हा सर्व प्रकार समोर आला. यासंदर्भात संबंधित रुग्णालयाला पत्र पाठवून यापुढे असे प्रकार घडल्यास फौजदारी गुन्हा दाखल करून अशी नोटीस बजावण्याचे आदेश वरिष्ठ अधिकाऱ्यांनी दिले आहे.

तसेच महापालिकेच्या पॅनलवर असलेल्या इतर रुग्णालयांना खबरदारी घ्यावी यासाठी पत्र पाठविण्यात येणार आहेत. दरम्यान हा प्रकार समोर आल्यानंतर आरोग्य विभागातील कर्मचारी, अधिकाऱ्यांनी असा प्रकार घडलाच नाही असे सांगत या प्रकरणावर पांघरून घालण्याचा प्रयत्न करत आहेत.