पुणे - साधारणत: तीन ते सहा वर्षे वयोगटातील विद्यार्थ्यांना (Student) शिक्षणाची (Education) आवड लावणारे पूर्व प्राथमिक शिक्षणाची दारं उघडावीत, विद्यार्थ्यांना पूर्व प्राथमिक शाळांच्या (School) माध्यमातून मोकळे आकाश मिळावे. लहान मुलांचा सर्वार्थाने विकास होण्यासाठी आवश्यक असणाऱ्या शाळांचे कुलूप आता उघडावे, अशी मागणी होऊ लागली आहे.

कोरोनाचा संसर्ग वाढल्यामुळे मार्च २०२० मध्ये शाळा बंद करण्यात आल्या. त्याचवेळी पूर्व प्राथमिक शाळांनाही कुलूप लावण्यात आले. आता टप्प्या-टप्प्याने सर्व शाळा सुरू होत आहे. असे असताना पूर्व प्राथमिक शाळा सुरू कराव्यात की नाही, असा प्रश्न शाळा चालकांना पडला आहे. तर गेल्या दोन वर्षांपासून या शाळा बंद असल्याने आता तरी मुलांना शाळेत प्रत्यक्ष वर्गात बसून शिक्षण मिळावे, अशी आग्रही मागणी पालकांकडून होत आहे.

परिणामी, पूर्व प्राथमिक शाळांबाबत कोणताही निर्णय अधिकृतरीत्या जाहीर करण्यात आला नसल्याने शाळा चालकांची कोंडी वाढली आहे. यावर प्रकाश टाकणारे वृत्त ‘सकाळ’ने १४ फेब्रुवारी रोजी प्रसिद्ध केले होते. त्याला प्रतिसाद देत वाचकांनी मते नोंदविली आहेत.

आनंद सप्तर्षी म्हणाले, ‘योग्य वयात शिक्षण न मिळाल्यास मुलांबरोबरच देशाचेही नुकसान होणार आहे. मुले एका जागी तासन्‌तास स्वस्थ बसू शकत नाहीत. पूर्व प्राथमिक शिक्षणाबाबत सरकारच्या उदासीन कारभारामुळे देश मागे पडत आहे.’

पूर्व प्राथमिक वयोगटातील मुले दोन ते तीन तास शाळेत येतात. सवंगड्याबरोबर खेळतात, बागडतात, खेळणी हाताळतात, चित्रे पाहतात, धावतात, पळतात, एकत्र डबा खातात, जवळीक साधतात. हेच ‘सामुदायिक जीवन’ बालकांच्या सर्वांगीण विकासाची सुरुवात करून देते. म्हणूनच शाळा सुरू होणे गरजेचे आहे.

- संध्या वाडेकर, सेवानिवृत्त शिक्षिका

पूर्व प्राथमिक शाळा सकाळी अकरा ते दुपारी एक या वेळेत भरवायला पाहिजे. तसेच या शाळा ३० एप्रिलपर्यंत सुरू ठेवणे गरजेचे आहे. या वयोगटातील विद्यार्थ्यांच्या ऑनलाइन शाळा बंद कराव्यात आणि त्यांना प्रत्यक्ष शाळेतून शिक्षण देण्याची गरज आहे.

- श्रीपाद वाघ

तीन ते सहा वर्षे वयोगटातील मुलांसाठी बालवाडी शिक्षण हे पुढील शिक्षणाचा पाया आहे. त्यामुळे शिक्षण पूर्ववत व्हावे.

- राजश्री जाधव, बालवाडी शिक्षिका