बारामती - शहराच्या इतिहासातील पहिले देहदान आज झाले. नव्याने सुरु झालेल्या शासकीय वैद्यकीय महाविद्यालयामुळे आता बारामतीत देहदान शक्य होणार आहे. महाविद्यालय सुरु झाल्यानंतर प्रथमच अमृतलाल गांधी यांनी देहदान केले.

त्यांनी काही महिन्यांपूर्वी देहदानाची इच्छा व्यक्त केली होती. त्यांच्या इच्छेनुसार त्यांचे लहान बंधू किरण गांधी यांनी त्यांच्या मृत्यूपश्चात त्यांचा देह वैद्यकीय महाविद्यालयाकडे सुपूर्द केला. किरण गांधी यांना महाविद्यालयाचे अधिष्ठाता डॉ. चंद्रकांत म्हस्के यांच्या हस्ते प्रमाणपत्र प्रदान करण्यात आले.

शुक्रवारी (ता. 30 डिसेंबर) अमृतलाल गांधी (वय 72) यांचा देह त्यांच्या घरून शासकीय महाविद्यालयात आणला गेला. शरीररचनाशास्त्र विभाग प्रमुख डॉ. गीतांजली सुडके, उप अधिष्ठाता डॉ. अंजली शेटे, डॉ.वसीम हिरोली, किरण घुगे यांनी त्याचा स्विकार केला.

बारामतीतील शासकीय वैद्यकीय महाविद्यालय सुरु झाल्यानंतर चार वर्षात प्रथमच देहदान झाले व देह स्विकारला गेला. संशोधनाच्या उद्देशाने त्याचा भविष्यात विनियोग होणार असल्याचे सांगण्यात आले. बारामतीत प्रथमच देहदान होऊन देह स्विकारण्याची घटना घडली आहे.

...ऐतिहासिक क्षणाची नोंद.....

बारामतीत या पूर्वी देह स्विकारण्याची सुविधा उपलब्ध नव्हती. देह स्विकारण्यासाठी वैद्यकीय महाविद्यालयाची गरज असते. बारामतीत महाविद्यालय सुरु होऊनही चार वर्षे झाले पण देहदानासाठी कोणी पुढे आले नव्हते, अमृतलाल यांनी ते हयात असताना देहदानाची इच्छा प्रदर्शित केलेली होती, आणि त्यांच्या कुटुंबियांनी त्यांच्या इच्छेनुसार त्यांचे देहदान केले.

देहदानाचे महत्वच वेगळे...

जैन समाजात दानाचे अनन्यसाधारण महत्व आहे मात्र देहदान करुन अमृतलाल गांधी यांनी एक वेगळा आदर्श घालून दिला आहे. त्यांच्या इच्छेनुसार त्यांचे देहदान आम्ही कुटुंबियांनी केले.- किरण गांधी, बारामती.