पुणे - "तुम्हाला कौन बनेगा करोडपतीमध्ये लॉटरी लागली आहे', असे सांगणारा अनोळखी व्यक्तीचा फोन किंवा मेसेज तुम्हाला आला असेल तर त्याला प्रतिसाद देऊ नका. सुरुवातीला +92 असलेल्या क्रमांकावरून आलेले फोन कदाचित पाकिस्तानचे असू शकतात आणि ते तुम्हाला कोट्यवधीची लॉटरी लागल्याची बतावणी करून तुमचे बॅंक खाते क्षणार्धात रिकामे करू शकतात. 

पुण्यासह राज्यात आत्तापर्यंत उत्तरेकडील काही राज्यांमधील सायबर गुन्हेगार, त्यांचे कॉल सेंटर यांच्याकडून नागरिकांशी ई-मेल, व्हॉट्‌सऍप, फेसबुक, ट्विटर, इन्स्टाग्राम अशा सोशल मीडियाद्वारे सर्वसामान्य नागरिकांशी संपर्क साधत, त्यांचा विश्वास संपादन करून त्यांच्या बॅंक खात्याची गोपनीय माहिती, ओटीपी क्रमांक मिळवून त्यांच्या खात्यातील लाखो रुपये काढले जात असल्याचे चित्र होते. 

पुण्याच्या बातम्या वाचण्यासाठी येथे  क्लिक करा

सध्या हे चित्र काही प्रमाणात बदलत असून आता भारतातूनच नाही, तर पाकिस्तानातूनच ऑनलाइन फसवणुकीसाठीचे फोन येत असल्याचे सायबर पोलिसांनी दिलेल्या माहितीतून पुढे आले आहे. 

काय आहे +92 ? 
प्रत्येक देशाला आंतरराष्ट्रीय फोन कॉल करण्यासाठी त्यांचे "कंट्री कॉलिंग कोड' आहेत. भारताचा कंट्री कॉलिंग कोड हा +91 या क्रमांकाने सुरू होतो. त्याच प्रमाणे इतर देशांनाही अशा पद्धतीचे क्रमांक आहेत. त्यामध्ये पाकिस्तानला +92 हा क्रमांक आहे. सुरुवातीला +92 असा क्रमांक दिसणाऱ्या मोबाईलवरून आलेल्या फोनद्वारे नागरिकांची ऑनलाइन फसवणूक केली जात असल्याचे महाराष्ट्र सायबर पोलिसांचे म्हणणे आहे. व्हॉट्‌सऍप कॉल किंवा गूगल ड्यूओ द्वारेही फोन येऊ शकतात. 

ताज्या बातम्यांसाठी डाऊनलोड करा ई-सकाळचे ऍप 

* गुन्ह्याच्या दोन पद्धती : 
पहिला प्रकार हा "केबीसी लॉटरी' आहे. +92 क्रमांकावरून आलेल्या फोनवरील व्यक्ती, तुम्हाला तुम्ही भाग्यवान आहात, एक कोटीच्या केबीसी लॉटरीसाठी तुमची निवड झाली आहे, असे सांगून केबीसीच्या लोगोचा वापर करून तुम्हाला व्हॉट्‌सऍपवर फोटो पाठवतात. त्यानंतर तुमच्या बॅंक खात्याची गोपनीय माहिती घेऊन पैसे काढतात. तर दुसऱ्या प्रकारातही याच पद्धतीने नवी कोरी कार तुम्हाला मिळाली असल्याचे सांगून ही कार पाठविण्यासाठी विविध प्रकारचे शुल्क लागत असल्याचे स्पष्ट करीत, ऑनलाइन फसवणूक करतात. 

* फसवणूक टाळण्यासाठी अशी घ्या काळजी 
- कंट्री कॉलिंग कोड +92 वरून आलेला फोन किंवा मेसेजला प्रतिसाद देऊ नका 
- वैयक्तिक किंवा बॅंकेविषयीची गोपनीय माहिती कोणालाही देऊ नका 
- आपण लॉटरी घेतलेली नसल्याने विजेते होण्याचा प्रश्नच नाही, हे लक्षात ठेवा 
- प्रक्रिया शुल्क भरा किंवा आगाऊ रक्कम द्या, असा विषय आल्यास फसवणूक होण्याची दाट शक्‍यता 
- कुठलीही लिंक किंवा मेसेजवर क्‍लिक करू नका 
- तुमचे व्हॉट्‌सऍप प्रोफाइल, संपर्क क्रमांक, स्टेट्‌स कोणी बघणार नाही, अशी व्यवस्था करा 

इथे साधा संपर्क : 
- कंट्री कॉलिंग कोड +92 किंवा अशा प्रकारचे फोन आल्यास पोलिसांशी किंवा टेलिकॉम सर्विस प्रोव्हायडरच्या (टीएसपी) 1800110420 किंवा 1663 या टोल फ्री क्रमांकावर संपर्क साधा.