कराचा प्रस्ताव मंजूर
होणार की स्थगित?
पंढरपूर न.पा.च्या आजच्या सभेकडे लक्ष
सकाळ वृत्तसेवा
पंढरपूर, ता. ८ : पंढरपूर नगरपालिकेची सर्वसाधारण सभा बुधवारी (ता. ९) होत आहे. बाहेरगावाहून श्री विठ्ठल- रुक्मिणी दर्शनासाठी येणाऱ्या वाहनांकडून पार्किंग व आरोग्य कर वसुलीचा ठेका देण्याचा प्रस्ताव सभेत मांडण्यात येणार आहे. प्रस्तावावर चर्चा होऊन निर्णय होण्याची शक्यता असली तरी, स्थानिक नागरिक, भाविक आणि काही नगरसेवकांकडून या प्रस्तावाला विरोध होत असल्याने सभेकडे लक्ष लागले आहे.
पंढरपूरला दररोज राज्यभरातून भाविक दर्शनासाठी येतात. त्यांच्या वाहनांकडून पार्किंग व आरोग्य कराच्या नावाखाली वसुली केल्यास भाविकांमध्ये नाराजी निर्माण होऊन पंढरपूरच्या प्रतिमेवर परिणाम होईल, अशी भूमिका विरोधकांकडून मांडली जात आहे. या करामुळे भाविकांची संख्या कमी होऊन स्थानिक व्यवसायावरही परिणाम होण्याची भीती नागरिक व्यक्त करीत आहेत.
यापूर्वीही पालिकेने पार्किंग व आरोग्य कराची वसुली सुरू केली होती. त्यावेळी सोशल मीडियावर भाविकांनी तीव्र नाराजी व्यक्त केली होती. भाविकांकडून ‘जिझिया करासारखी वसुली’ होत असल्याची टीका झाल्यानंतर वाद निर्माण झाला आणि अखेर ठेका रद्द करण्यात आला होता. आता पुन्हा याच विषयाचा प्रस्ताव आल्याने विरोधाची धार वाढली आहे. सत्ताधारी गटातील काही नगरसेवकांचाही प्रस्तावाला अंतर्गत विरोध असल्याची माहिती सूत्रांनी दिली. त्यामुळे प्रस्ताव मंजूर होतो की पुन्हा स्थगित होतो, याकडे पंढरपूरकरांचे लक्ष लागले आहे.