परभणी, हिंगोली जिल्ह्यांतील
७२ मंडलांत हलका पाऊस

दीर्घ खंडामुळे पिके संकटात; सर्वदूर जोरदार पावसाची गरज

ॲग्रोवन वृत्तसेवा
परभणी : परभणी व हिंगोली जिल्ह्यांतील ८२ पैकी ७२ मंडलांत सोमवारी (ता. २४) सकाळी १० वाजेपर्यंतच्या २४ तासांत खूप हलका ते मध्यम पाऊस झाला. मात्र, परभणी जिल्ह्यातील १० मंडलांत पावसाने हुलकावणी दिली. परभणी जिल्ह्यात सरासरी ५ मिलिमीटर, तर हिंगोली जिल्ह्यात सरासरी ८.१ मिलिमीटर पाऊस झाला.
दीर्घ खंडानंतर झालेल्या पावसामुळे काही मंडलांतील पिकांना दिलासा मिळाला असला, तरी या दोन्ही जिल्ह्यांत सर्वदूर दमदार पावसाची गरज आहे. अन्यथा खरीप पिके हाती लागण्याची शक्यता धूसर आहे.
परभणी जिल्ह्यातील परभणी, जिंतूर, सेलू, मानवत, पाथरी, सोनपेठ, गंगाखेड, पालम आणि पूर्णा तालुक्यांतील ४२ मंडलांत रविवारी (ता. २३) रात्री पाऊस झाला. जिल्ह्यात मागील २४ तासांत सरासरी ५ मिलिमीटर, ऑगस्ट महिन्यात आजवर सरासरी ४८.३ मिलिमीटर (२७.४ टक्के), तर यंदा १ जूनपासून आजवर सरासरी ३५३.१ मिलिमीटर (६५.३ टक्के) पाऊस झाला.
हिंगोली जिल्ह्यातील हिंगोली, कळमनुरी, वसमत, औंढा नागनाथ आणि सेनगाव तालुक्यांतील ३० मंडलांत खूप हलका ते मध्यम पाऊस झाला. जिल्ह्यात गेल्या २४ तासांत सरासरी ८.१ मिलिमीटर, ऑगस्ट महिन्यात आजवर सरासरी ६८ मिलिमीटर (३६.४ टक्के), तर यंदा १ जूनपासून आजवर सरासरी ४७९.१ मिलिमीटर (८१.७ टक्के) पाऊस झाला.

मंडलनिहाय पाऊस (५ मिलिमीटरपेक्षा अधिक)
परभणी जिल्हा : परभणी ८.५, परभणी ग्रामीण ६, जांब ५, दैठणा ६.५, पिंगळी ७.५, गंगाखेड ११.५, राणीसावरगाव ९, पालम ३३, चाटोरी ९, बनवस १४.३, पेठशिवणी ६.५, रावराजूर २१, लिमला २१, कात्नेश्वर २२.५, चुडावा १२.५, कावलगाव ५.५.

हिंगोली जिल्हा : हिंगोली ८, नर्सी नामदेव ११.३, सिरसम ५.८, डिग्रस ५.५, माळहिवरा ५.८, खंबाळा १९.३, कळमनुरी ११.५, वाकोडी ११.५, नांदापूर ११.५, डोंगरकडा ५.३, वारंगा ५, वसमत १३.३, हयातनगर १३.३, गिरगाव १२, टेंभुर्णी १३.३, कुरुंदा ५.८, औंढा नागनाथ १३.५, येळेगाव ५.५, साळणा ९, जवळा बाजार ९.५, गोरेगाव २४.८.