पुणे, ता. १८ : विद्यार्थ्यांच्या शैक्षणिक प्रगतीसोबतच त्यांच्या वर्तनातील बदल, मानसिकता आणि दैनंदिन सवयींबाबत पालकांना मार्गदर्शन करण्यासाठी लक्ष्मणराव आपटे प्रशालेत पालक समुपदेशक सभेचे आयोजन केले होते. पाचवी ते दहावीच्या विद्यार्थ्यांच्या पालकांसाठी ही सभा घेण्यात आली. प्रशालेच्या समुपदेशिका सुलक्षणा समुद्र यांनी पालकांशी संवाद साधताना मुलांमधील हट्टीपणा, मोबाईलचा अतिवापर, शिवीगाळ, पालकांचे न ऐकणे, अभ्यासातील अनास्था, व्यसनाधीनतेचा धोका, चुकीच्या सवयी यांसारख्या विविध विषयांवर मार्गदर्शन केले. पालकांनी मुलांशी संवाद साधताना संयम, समजूतदारपणा आणि सकारात्मक दृष्टिकोन ठेवण्याचे आवाहन त्यांनी केले. मुख्याध्यापक अजित गायकवाड यांनीही पालकांशी संवाद साधून विद्यार्थ्यांच्या सर्वांगीण प्रगतीसाठी शाळा आणि पालक यांच्यातील समन्वयाचे महत्त्व स्पष्ट केले. कार्यक्रमाची प्रस्तावना शिक्षिका कविता शिंदे यांनी केली.