पुणे - ‘आयुष्यमान भारत’ योजनेअंतर्गत गेल्या चार महिन्यांत देशभरात साडेचौदा लाखा रुग्णांनी याचा लाभ घेतला असून, त्यासाठी १८ हजार कोटींचा खर्च केला आहे. ही योजना गरिबांना समर्पित करण्यात आली आहे. रुग्णांच्या खर्चाचा ८० टक्के भार सरकार उचलत आहे, असे प्रतिपादन केंद्रीय आरोग्यमंत्री जे. पी. नड्डा यांनी केले.  

कसबा पेठेतील सूर्या सह्याद्री रुग्णालयातील खाटांचे ‘आयुष्यमान भारत’ आणि राज्य शासनाच्या ‘महात्मा फुले जनआरोग्य’ योजनेसाठी लोकार्पण व्हिडिओ कॉन्फरन्सिंगद्वारे नड्डा यांनी आज केले. या वेळी नॅशनल इन्श्‍युरन्स कंपनीसोबत सामंजस्य करार करण्यात आला, त्या वेळी ते बोलत होते. सार्वजनिक बांधकाममंत्री एकनाथ शिंदे, सह्याद्री रुग्णालयाचे अध्यक्ष डॉ. चारुदत्त आपटे, मुख्य कार्यकारी अधिकारी डॉ. सुधाकर शिंदे, कार्यकारी संचालक डॉ. जयश्री आपटे, नॅशनल इन्श्‍युरन्स कंपनीचे रवी अय्यर, रुग्णालयाचे वैद्यकीय संचालक डॉ. जयसिंग शिंदे, युनिटप्रमुख केतन आपटे, रवी धोत्रे उपस्थित होते.

नड्डा म्हणाले की, अमेरिका, कॅनडा, मेक्‍सिको या देशांच्या लोकसंख्येपेक्षा जास्त लोकांना याचा लाभ मिळणार आहे. या योजनेसाठी संपूर्ण ७८ खाटा लोकार्पण करणारे सूर्या सह्याद्री रुग्णालय हे देशातील पहिले रुग्णालय आहे. इतर रुग्णालयांनीही यामध्ये सहभाग घ्यावा.

केंद्राची ‘आयुष्यमान भारत’ आणि राज्य सरकारची ‘महात्मा फुले जनआरोग्य योजना’ रुग्णांसाठी नवसंजीवनी देणाऱ्या ठरल्या आहेत. पैसे नसल्याने गरीब लोक उपचार घेत नव्हते. आता या दोन्ही योजनांमुळे त्यांना दिलासा मिळाला आहे. सूर्या सह्याद्री हे रुग्णालय समर्पित भावनेने सहभागी झाले आहे; तसेच इतरही रुग्णालयांनी सहभागी होऊन रुग्णांना उपचार द्यावेत, असे आवाहन एकनाथ शिंदे यांनी केले.

भाजप नेत्यांची दांडी
‘आयुष्यमान भारत’ योजनेच्या पुण्यातील कार्यक्रमाला भाजपच्या नेत्यांनी दांडी मारली. पालकमंत्री गिरीश बापट, महापौर मुक्ता टिळक आणि खासदार अनिल शिरोळे यांच्यासह कोणताच पदाधिकारी या कार्यक्रमाला उपस्थित नव्हता. विशेष म्हणजे, शिवसेनेचे नेते व सार्वजनिक बांधकाममंत्री एकनाथ शिंदे हे कार्यक्रमाला आवर्जून उपस्थित होते.