शिवाजीनगर : पुणे आंतरराष्ट्रीय चित्रपट महोत्सव १८ ते २५ जानेवारी दरम्यान होईल. यात ५१ देशांमधील सुमारे १४० पेक्षा जास्त चित्रपट दाखविले जातील, अशी माहिती महोत्सवाचे संचालक डॉ. जब्बार पटेल यांनी शुक्रवारी पत्रकार परिषदेत दिली.

पुणे फिल्म फाउंडेशन आणि महाराष्ट्र शासन यांच्यातर्फे महोत्सवाचे आयोजन करण्यात आले आहे. ‘चित्रपट एक आशा’ (सिनेमा इज अ होप) असे यंदाच्या महोत्सवाचे सूत्र आहे. या वेळी तीन ठिकाणी एकूण ११ स्क्रीनवर चित्रपट दाखविले जातील.

सेनापती बापट रस्त्यावरील पॅव्हेलियन मॉलमधील पीव्हीआर आयकॉन (६ स्क्रीन), कॅम्प परिसरातील आयनॉक्स (३ स्क्रीन) आणि औंध भागातील वेस्टएन्ड मॉलमधील सिनेपोलीस (२ स्क्रीन) येथे चित्रपटांचा आस्वाद घेता येईल. प्रेक्षकांचा वाढता प्रतिसाद पाहता यंदा आणखी दोन स्क्रीन उपलब्ध करण्यात आले.

शुक्रवारी (ता. २३) महोत्सवाच्या www.piffindia.com या अधिकृत संकेतस्थळावर ऑनलाइन नोंदणी सुरू झाली. चित्रपटगृहांमध्ये जागेवर नोंदणीची प्रक्रिया पाच जानेवारीपासून सुरू होईल.

यंदा ६८ देशांतून ११८६ चित्रपटांच्या प्रवेशिका संयोजकांकडे आल्या होत्या. या वेळी पुणे फिल्म फाउंडेशनचे सचिव रवी गुप्ता, चित्रपट निवड समितीचे अध्यक्ष समर नखाते आदी उपस्थित होते.

गाजलेल्या चित्रपटांची रसिकांना पर्वणी

गाजलेले अनेक चित्रपट या महोत्सवात दाखविण्यात येतील. काही चित्रपटांची नावे ः अ सेन्सेटीव्ह पर्सन, ब्लागाज लेसन्स, सिटीझन सेंट, फ्लाय ऑन, हिअर, ओशन आर द रिअल कॉन्टिनेंटस्, पुआन, शल्मासेल, टेरिस्टेरीयल व्हर्सेस, द बर्डन्ड, द ड्रीमर, द सेन्टेन्स, टोल, टुमारो इज अ लाँग टाइम