पिंपळवंडी - पिंपळवंडी (ता. जुन्नर) येथील पुणे जिल्हा मध्यवर्ती बँक व विविध कार्यकारी सोसायटीत सोमवारी (ता. १५) मध्यरात्री ३ ते ४ वाजण्याच्या सुमारास अज्ञात चोरट्यांनी चोरी करण्याचा प्रयत्न केला असल्याची माहिती बँकेचे शाखा अधिकारी इंद्रजित चंडालिया यांनी दिली.

चंडालीया यांनी सांगितले की, सोमवारी सकाळी साडेआठ वाजण्याच्या सुमारास पिंपळवंडी विविध कार्यकारी सोसायटीमध्ये काम करत असलेले अमोल भागवत यांनी त्यांना फोन करून कळविले की, सोसायटीच्या कार्यालयातील खिडकीचे गज कापलेले असून शटरचा आतील दरवाजा लावलेला आहे. सकाळी मी पिंपळवंडी येथे येऊन सोसायटीचे चेअरमन रघुनाथ लेंडे यांना सदर माहिती कळवली असता त्यांनी आळेफाटा पोलीस स्टेशनला सदर घटना कळवली.

आळेफाटा पेालीस स्टेशनचे अधिकारी व कर्मचारी त्याठिकाणी आल्यानंतर पोलिसांनी गज कापलेल्या खिडकीतून आत जाऊन शटरचा दरवाजा उघडला. विविध कार्यकारी सोसायटीच्या कार्यालयाची पहाणी केली असता सोसायटीचा पुढील दरवाजा उघडा असल्याचे निदर्शनात आले.

चोरट्यांनी तेथील कपाटांचे दरवाजे उघडुन त्यातील कागदपत्र अस्ताव्यस्त टाकलेली होती. तसेच पहिल्या मजल्यावर असलेल्या बँकेची पाहणी केली असता बँकेच्या ग्रिलच्या दरवाजाचे कुलुप तोडण्याचा प्रयत्न केला असल्याचे दिसले, ते कुलुप तोडता न आल्याने चोरट्यांना आत मध्ये प्रवेश करता आला नाही. सुरक्षारक्षक हे तेथील धान्य दुकानाजवळ बसले असता त्यांना कोणताही आवाज आला नसल्याचे त्यांनी सांगितले.

सोसायटीच्या इमारतीच्या मागील बाजूस असलेल्या उसाच्या शेतातून चोरट्यांनी बांबुची शिडी बनवुन प्रथमतः स्वच्छता गृहाच्या खिडकीचे ग्रील कापले त्यातुन आतमध्ये प्रवेश करता न आल्याने त्यांनी कार्यालयाच्या खिडकीचे ग्रील कापुन आत प्रवेश केला.

सदर घटनेची फिर्याद आळेफाटा पोलीस स्टेशन मध्ये दिलेली असुन पोलीस निरीक्षक यशवंत नलावडे यांच्या मार्गदर्शनाखाली पुढील तपास सुरू आहे.