पिंपरी, ता. ४ : वाकड, चिखली आणि पिंपरी परिसरातील स्टार बाजार येथून काजू, बदाम अशा महागड्या खाद्य वस्तूंची चोरी करणाऱ्या टोळीला वाकड पोलिसांनी जेरबंद केले आहे. चार महिलांसह सात जणांना अटक करून त्यांच्याकडून सात लाख २१ हजार रुपयांचा मुद्देमाल जप्त केला आहे.
रविकांत देवानंद जाकरे, ब्रिजेश सीताराम मदेशिया, ब्रिजेश बाळू यादव, सोनम बाबू शेख (सर्व रा. जोगेश्वरी ईस्ट, मुंबई), सलमा शकिल शेख (रा. भोसरी), सानिया बाबुमिया शेख आणि रूमा ब्रिजेश मदेशिया (दोघेही रा. जोगेश्वरी ईस्ट, मुंबई) कशी अटक केलेल्या आरोपींची नावे आहेत. वाकड येथील दत्त मंदिर रस्ता व कलाटे वस्ती येथील स्टार बाजारमधून ४२ हजार १०० रुपये किमतीचे तूप, काजू, बदाम असे साहित्य चोरून नेले. याबाबत वाकड पोलिस ठाण्यात गुन्हा दाखल होता.
पोलिसांनी घटनास्थळासह परिसरातील सीसीटीव्ही फुटेजची पाहणी करीत तांत्रिक विश्लेषण करून ताथवडे-वाकड परिसरातून संशयित मोटार व एक रिक्षा ताब्यात घेतली. वाहनातील आरोपींकडे कसून चौकशी केली असता त्यांनी चोरीची कबुली दिली.
आरोपींची कसून चौकशी केली असता, त्यांनी पिंपरी आणि चिखली पोलिस ठाण्यांच्या हद्दीतील स्टार बाजारामध्येही अशाच प्रकारच्या चोऱ्या केल्याची कबुली दिली. तसेच काटे पिंपळे आणि केसनंद फाटा येथील स्टार बाजारामधूनही खाद्य पदार्थ चोरल्याचे उघडकीस आले. हे सर्व आरोपी सराईत गुन्हेगार आहेत.